Հայաստանի «ոսկե զավակները»

«Սամվել Ալեքսանյանն ինձ չի նվիրել, ես ունեմ այդ մեքենայից ու շա՜տ վաղուց: Ընկերս նվիրել է Ռաֆուլին..»՝ հայտարարել է Ռուբեն Հայրապետյանը լրատվամիջոցներից մեկի հետ հարցազրույցում՝ խոսելով Սամվել Ալեքսանյանի կողմից նվիրած «Ռոլլս-Ռոյս» մակնիշի ավտոմեքենայի մասին։ Թե արդյոք նա համալսարան կգնա այդ մեքենայով հարցին Հայրապետյանը պատասխանել է՝ «մեքենան կանգնած կմնա.. երբ որ տոն օրեր կլինեն, ինչ որ առիթներ և այլն, էդ ժամանակ էլ կվարի: Էդ շքեղ մեքենաներով ինքը դասի չի գնում ու ոչ մեկին չպիտի դրանցով զարմացնի»:

Ինչպես ավելի վաղ հայտնել էր ԼՈՒՐԵՐ.com-ը, անցնող 2011 թվականի դեկտեմբերի վերջին «Նիգ Ապարան» հայրենակցական միության նորընտիր նախագահ, ծագումով ապարանցի գործարար Սամվել Ալեքսանյանը երկու «Ռոլլս-Ռոյս» մակնիշի թանկարժեք ավտոմեքենա է Հայաստան բերել Դուբայից:

ԼՈՒՐԵՐ.com-ը հայտնել էր նաև, որ սպիտակ գույնի շքեղ ավտոմեքենաներից մեկը Սամվել Ալեքսանյանը պահել է իրեն, իսկ մյուսը նվիրել է ՀՀԿ-ական պատգամավոր Ռուբեն Հայրապետյանին, որի հետ Ալեքսանյանը մշտապես ընկերական, ջերմ հարաբերություններ է ունեցել: Ընկերությո՞ւնն է միայն այդ շքեղ նվերի գինը, թե այլ թաքուն եւ մութ իրողություններ են ընկած «մաղարիչի» հիմքում՝ դժվար է ասել:

Ավելացնենք նաեւ, որ «Ռոլլս-Ռոյս» մակնիշի ավտոմեքենայի գինը տատանվում է 500 հազարից մեկ միլիոն ԱՄՆ դոլարի տիրույթում՝ կախված մեքենայի տարեթվից եւ մոդելից: