Փարիզը հայտարարել է՝ կարող է միջուկային զսպման միջոցներ կիրառել ԵՄ երկրներին պաշտպանելու համար

Ֆրանսիայի զինված ուժերի նախարար Սեբաստիան Լեկորնուն ուղղակիորեն հայտարարել է երկրի միջուկային զսպման ուժերը Եվրամիության մյուս պետություններին պաշտպանելու համար օգտագործելու հնարավորության մասին: Այսպես է նա Franceinfo ռադիոյով մեկնաբանել Մեծ Բրիտանիայի հետ համատեղ միջուկային հովանոց տեղակայելու մասին տեղեկությունը՝ այնտեղից ԱՄՆ ռազմական կոնտինգենտի դուրսբերման դեպքում Գերմանիայի պաշտպանության համար։

Նախարարն ընդգծել է, որ Ֆրանսիայի միջուկային զենքը վերահսկվում է միայն Փարիզի կողմից, իսկ դրա կիրառման որոշումը կայացնում է պետության ղեկավարը՝ «կենսական շահերը» պաշտպանելու համար։

«Ֆրանսիայի կենսական շահերը խստորեն սահմանափակվա՞ծ են մեր սահմաններով։ Գեներալ Շառլ դը Գոլից հետո մի քանի պետությունների ղեկավարներ, այդ թվում՝ Էմանուել Մակրոնը, ասացին, որ մեր կենսական շահերը եվրոպական հարթություն ունեն։ Գեներալ դը Գոլն էլ ավելի կոնկրետ էր. 1964 թվականին զինված ուժերին ուղղված հանձնարարականում նա գրել էր, որ Ֆրանսիայի կենսական շահերը կվտանգվեն, եթե հարձակվեն Արևմտյան Գերմանիայի և Բենիլյուքսի երկրների վրա»,- ասել է Լեկորնուն, փոխանցում է ՏԱՍՍ-ը։