Գերմանիայի ապագա կանցլեր Մերցն ու Ֆրանսիայի նախագահ Մակրոնը հանդիպել են

Բունդեսթագի արտահերթ ընտրություններում հաղթած Գերմանիայի կանցլերի թեկնածու Ֆրիդրիխ Մերցը Փարիզում հանդիպել է Ֆրանսիայի նախագահ Էմանուել Մակրոնի հետ։

Իր X միկրոբլոգում Մերցը հրապարակել է իր և Մակրոնի լուսանկարը: «Հարգելի Էմանուել Մակրոն, շատ շնորհակալ եմ ձեր բարեկամության և գերմանաֆրանսիական հարաբերություններում վստահության համար: Միասին մեր երկրները կարող են մեծ հաջողությունների հասնել Եվրոպայի համար»,- գերմաներեն և ֆրանսերեն գրել է պահպանողական քաղաքական գործիչը:

Մերցի և Մակրոնի միջև Ելիսեյան պալատում երեք ժամ տևած զրույցից հետո երկու քաղաքական գործիչներն էլ «ցույց են տվել գերմանաֆրանսիական հարաբերություններում նոր էջ սկսելու կամք»։ Այս մասին ասվում է CDU/CSU դաշինքի հայտարարության մեջ, մեջբերում է dpa-ն գործակալությունը: Դրանում ասվում է, որ «բանակցություններն ընթացել են բացառիկ բարեկամական մթնոլորտում, մի շարք թեմաների շուրջ ձեռք է բերվել մեծ համաձայնություն, և գտնվել են համատեղ նախաձեռնությունների բազմաթիվ ելակետեր»։

Հանդիպման այլ մանրամասներ հրապարակման պահին հայտնի չեն: Ֆրանսիական կողմը դեռ չի մեկնաբանել հանդիպումը։