Իռլանդիան հայտարարել է՝ պատրաստ է խաղաղապահներ ուղարկել Ուկրաինա

Իռլանդիան պատրաստ է օգնել Ուկրաինային, այդ թվում՝ խաղաղապահներ ուղարկելով։ Այս մասին Իռլանդիայի վարչապետ Մայքլ Մարտինը հայտարարել է Վոլոդիմիր Զելենսկու հետ հանդիպման ժամանակ, գրում է Irish Examiner-ը։

Հրատարակության համաձայն՝ Մարտինը Զելենսկու հետ քննարկել է մի շարք հարցեր, մասնավորապես՝ աշխատանքը Ուկրաինայում կայուն ու հուսալի խաղաղ կարգավորման ուղղությամբ։

«Մենք հստակ ասել ենք, որ ակտիվորեն աջակցելու ենք Ուկրաինայի՝ Եվրամիությանն անդամակցելու արագացված գործընթացին: Սա կարևոր առաջնահերթություն է, քանի որ նախ այն ապահովում է Ուկրաինայի անվտանգության որոշակի երաշխիքներ, ինչպես նաև տնտեսական հնարավորություններ է բացում նրա համար ապագայում»,- ասել է Մարտինը։

Հիշեցնենք, որ Ուկրաինա զորք ուղարկելու մասին քննարկումները վերսկսվել են 2024 թվականի նոյեմբերին՝ ԱՄՆ նախագահական ընտրություններում Դոնալդ Թրամփի հաղթանակից հետո։

Զելենսկին ասել է, որ Ուկրաինայում խաղաղություն ապահովելու համար անհրաժեշտ է 100 000 խաղաղապահ, և նրա հանձնարարությամբ զինվորականները մշակել են քարտեզ, որը ցույց է տալիս օտարերկրյա զորքերի իրական անհրաժեշտությունը երկրում խաղաղություն ապահովելու համար։