Ուկրաինայի ԱԳՆ-ն սպառնացել է Լեհաստանի նախագահի թեկնածուին

Ուկրաինայի արտաքին գործերի նախարարությունը արձագանքել է Լեհաստանի նախագահի թեկնածու Սլավոմիր Մենցենի հայտարարությանը Բանդերայի պաշտամունքի անթույլատրելիության մասին։

Այս շաբաթ Լեհաստանի Համադաշնություն կուսակցության քաղաքական գործիչ Սլավոմիր Մենցենը Եվրախորհրդարանի պատգամավոր Աննա Բրիլկայի հետ միասին հայտարարել էր, որ ուկրաինացիները պետք է որքան հնարավոր է շուտ վերջ տան 100 հազար լեհերի սպանության մեջ մեղավոր հանցագործի պաշտամունքին։

Ի պատասխան՝ Լվովի քաղաքապետ Անդրեյ Սադովին Մենցենին անվանել է «լեհական անձնագրով ռուսամետ քաղաքական գործիչ»՝ հայտարարելով, որ անհրաժեշտ է ստուգել՝ արդյոք նա նույնիսկ իրավունք ունի մուտք գործել ուկրաինական տարածք։ Սրան ի պատասխան՝ Մենցենն իր միկրոբլոգում գրել է.

«Ես լեհ եմ ու գնացել եմ լեհական գեղեցիկ մշակութային Լվով քաղաքը, որին ժամանակին ռուսները մեծ վնաս են հասցրել»։

Մենցենը նաև հավելել է, որ Սադովին պետք է արգելվի մուտք գործել Լեհաստան։

Մենցենի գրառումներին նախօրեին պատասխանել էր Ուկրաինայի ԱԳՆ-ն։ Մամուլի ասուլիսի ժամանակ Ուկրաինայի ԱԳՆ խոսնակ Գեորգի Տիխին հայտարարել է, որ «Ուկրաինան կոչ է անում լեհ քաղաքական գործիչներին զերծ մնալ Ուկրաինայի հետ կապված խնդիրները ներքին նախընտրական քարոզարշավում օգտագործելուց»։

«Նման ոչ բարեկամական քայլերը հակասում են Ուկրաինայի և Լեհաստանի միջև ռազմավարական գործընկերության ոգուն։ Դրանք չեն համապատասխանում պատմական հիշողության ոլորտում երկու երկրների ձեռքբերումներին և կարող են վնասել մեր ժողովուրդների բարեկամական հարաբերություններին»,- կարծում է Ուկրաինայի ԱԳՆ մամուլի քարտուղարը։

Տիխին նաև պարզաբանել է, որ Կիևն իրեն իրավունք է վերապահում համապատասխան միջոցներ ձեռնարկել այն անձանց դեմ, ովքեր «հակաուկրաինական գործունեություն» են ծավալում «ռուսական շարունակվող հարձակման» ժամանակ։

«Ցանկանում եմ ընդգծել, որ մենք, որպես արտաքին գործերի նախարարություն, չենք ընկալում որոշ հակաուկրաինացի քաղաքական գործիչների հայտարարությունները՝ որպես Լեհաստանի կամ լեհ հասարակության դիրքորոշում»,- կարծում է Տիխին։