Իրանի նախագահը նշել է Թրամփի հետ գործարքի կնքման սկզբունքային պայմանը

Իրանը ԱՄՆ-ի միջուկային ծրագրի վերաբերյալ համաձայնագիր կկնքի, եթե պահպանվի սկզբունքային պայմանը՝ Վաշինգտոնի հրաժարումը ճնշման քաղաքականությունից և ուժային մեթոդներից, հայտարարել է Իրանի նախագահ Մասուդ Փեզեշքիանը, փոխանցում է ISNA-ն։

«Իսլամական Հանրապետությունը ոչ մի պարագայում չի ենթարկվի ուժին», ընդգծել է նա։ Իրանի ԱԳ նախարար Աբբաս Արաղչին հայտարարել է, որ եթե նույնիսկ Իրանը համաձայնության գա ԱՄՆ-ի հետ, Թեհրանը չի դադարեցնի ուրանի հարստացումը: 

«Եթե ԱՄՆ - ն իսկապես շահագրգռված է, որ Իրանը միջուկային զենք չունենա, ապա համաձայնության հասնելը հնարավոր է, և մենք պատրաստ ենք լուրջ բանակցությունների, որպեսզի ընդմիշտ բացառենք նման սցենարը», - ասել է նա: «Սակայն ամեն դեպքում Իրանում ուրանի հարստացումը, անկախ նրանից՝ համաձայնություն ձեռք կբերվի, թե ոչ, շարունակվելու է», -եզրափակել է նա՝ հարստացման տեխնոլոգիայի յուրացումը անվանելով «ազգային ձեռքբերում»։