Խոսակցությունները, որ Իրան-Հայաստան գազամուղը պետք է ունենար այլ շառավիղ, բացարձակ սուտ են. Քոչարյան

Այդ կարգի բանակցությունների մասին տեղյակ չեմ, հիմա առաջին անգամ եմ լսում այն ինչ որ դուք ասացիք։ Այս մասին մի քանի լրատվամիջոցի տված հարցազրույցում ասել է ՀՀ երկրորդ նախագահ Ռոբերտ Քոչարյանը՝ անդրադառնալով նրան, որ ըստ Վիկիլիքսի բացահայտումների, Սերժ Սարգսյանի փեսան ԱՄՆ դեսպանի հետ հանդիպման ժամանակ վստահեցրել է, որ Իրան–Հայաստան գազամուղը տրանզիտ չի դառնա։

«Իրանի գազամուղի հետ նախագահի փեսան որևէ կապ չուներ և չէր կարող ունենալ։ Էն գլխից այդ գազամուղը չի ենթադրել որևէ տրանզիտային հնարավորություն։  Գազամուղները հենց այնպես չեն կառուցում, դրա համար դու պետք է կոնտրակտային պայմանագրեր ունենաս արդեն, թե ինչ ծավալի գազ, ինչ ծավալի նավթ առնելու են։ Մենք այդ գազամուղը կառուցեցինք, որովհետև իրանական կողմի հետ ստորագրել էինք «գազ էլեկտրականության դիմաց» փոխանակումը։ Դա էր հիմք հանդիսացել, որ այդ գազամուղը կառուցվում է, որ ինքը դատարկ չի լինելու, որ ինքը օգտագործվելու է։

Որևէ այլ հետաքրքրություն վրացական կողմի կամ ինչ-որ մեկ այլ կողմի, չի եղել։ Մեկ-մեկ ասում են՝ ավելի մեծ շառավղով գազամուղ պետք է կառուցվեր, բացարձակ սուտ է, որովհետև պայմանագրով ապահովված այլ ծավալներ մենք չենք ունեցել»,– հայտարարեց նա։