Հայաստանը քննարկում է տարբեր սցենարներ՝ Իրանում ստեղծված իրավիճակի առնչությամբ. փոխվարչապետ

Իրան-Իսրայել հակամարտության առնչությամբ՝ Հայաստանը քննարկում է տարբեր սցենարներ, ներառյալ՝ լոգիստիկայի, էներգետիկայի և փախստականների հարցերը։ Հունիսի 18-ին Ազգային ժողովի նիստում՝ պատասխանելով իշխող «ՔՊ» կուսակցության պատգամավոր Զարուհի Բաթոյանի հարցին, հայտարարել է ՀՀ փոխվարչապետ Մհեր Գրիգորյանը։

Բոլոր հնարավոր խնդիրներն, ըստ նրա, վերահսկման գործընթացում են։

«Այս կամ այն իրավիճակն անհնար է բացառել։ Մենք պետք է սցենարներ մշակենք, որոնք կարող են անհրաժեշտ լինել կամ չլինել», -ասել է Գրիգորյանը։

Միևնույն ժամանակ, ինչպես նշել է փոխվարչապետը, նման հարցերը չի կարելի կարող թողնել ինքնահոսի։

«Ես ձեզ վստահեցնում եմ. տարբեր գերատեսչություններ այս բոլոր հարցերը համախմբված ձևով քննարկում են։ Չէի ցանկանա մանրամասնել, քանի որ կան հարցեր, որոնց մասին խոսելու կարիք չկա։ Սակայն մշակվող սցենարներում ներառված են նաև էներգետիկային և լոգիստիկային առնչվող հարցեր։ Իրականում, լոգիստիկայի վերաբերյալ հարցեր արդեն իսկ առաջացել են։ Այս ամենը մնում է մեր ուշադրության կենտրոնում», -ընդգծել է կառավարության ներկայացուցիչը։

Ավելի վաղ ՀՀ էկոնոմիկայի նախարար Գևորգ Պապոյանը հայտարարել էր, որ Իրանի տարածքով տեղափոխվող մի շարք ապրանքներ չեն կարողանում հասցնել Հայաստան։ Դրանք կանգ են առել իրանական նավահանգիստներում և ճանապարհներին։

Հիշեցնենք նաև, որ հունիսի 13-ին Իսրայելը հարձակվեց Իրանի վրա, որին հաջորդեցին պատասխան միջոցառումները։ Ռազմական գործողությունները շարունակվում են։