Իրանում հայտարարել են, որ Իսրայելը հարձակվել է Թեհրանի նահանգի բնակելի թաղամասերի վրա

Հունիսի 24-ի առավոտյան Իսրայելը Թեհրանի նահանգում հարձակվել է 12 օբյեկտի վրա։ Այս մասին հայտարարել է Թեհրանի նահանգի նահանգապետ Մոհամմադ Սադեղ Մոթամեդիյանը, հաղորդում է Mehr գործակալությունը։

Մոթամեդիյանի խոսքով՝ Իսրայելի հրթիռների մեծ մասը, ենթադրաբար, հարվածել է բնակելի թաղամասերին։

Հունիսի 13-ի գիշերը Իսրայելը սկսել է «Առյուծի վերելք» գործողությունը՝ հարվածելով Իրանի միջուկային և ռազմական օբյեկտներին։ Իրանը պատասխանել է՝ սկսելով «Ճշմարիտ խոստում 3» գործողությունը և հարվածելով Իսրայելում գտնվող ռազմական օբյեկտներին։

Հունիսի 22-ի գիշերը ԱՄՆ նախագահ Դոնալդ Թրամփը հայտարարել է, որ ԱՄՆ ռազմաօդային ուժերը հարձակվել են Իրանի երեք միջուկային օբյեկտների վրա։ Նրա խոսքով՝ Իրանի ուրանի հարստացման հիմնական օբյեկտները «ամբողջությամբ ոչնչացվել են»։

Երկու օր անց Թրամփը հայտարարել է, որ Իրանը և Իսրայելը համաձայնության են եկել հրադադարի շուրջ։ Թրամփի խոսքով՝ երբ այն ուժի մեջ մտնի, աշխարհը կողջունի «12-օրյա պատերազմի պաշտոնական ավարտը»։