«Պատգամավորներից ով ում է «դոմփում»»․ ավագանու ՔՊ–ական անդամին դուր չեկավ հարցը

Եթե ձեր համար խնդիրը այստեղ բառամթերքն է, կարծում եմ՝ դուք այստեղ սխալ դիրքորոշում ունեք, որովհետև պետք է հարցը ընդհանուր բովանդակությանը նայել։ Այս մասին այսօր՝ հունիսի 24–ին, Երեւանի քաղաքապետարանում լրագրողների հետ զրույցում նշեց Երևանի ավագանու ՔՊ խմբակցության անդամ Միքայել Խաչատրյանը՝ անդրադառնալով հարցին, թե նորմա՞լ է համարում, որ վարչապետ Նիկոլ Փաշինյանը հայհոյական բառամթերքով է հանդես գալիս կաթողիկոսի եւ այլ հոգեւորականների հասցեին։

«Վարչապետը մի հարց է ուղղել Կտրիչ Ներսիսյանին, այլ ոչ թե կաթողիկոսին՝ նա կուսակրոնության ուխտը խախտե՞լ է, թե՞ ոչ։ Այս պարզ հարցին կան տարբեր բարդ պատասխաններ, տարբեր եկեղեցականներ փորձում են քաղաքական նկրտումներով պատասխանել և չես հասկանում իրենք քաղաքական գործիչ են թե եկեղեցականներ։ Ես խնդրում եմ այս հարցին  ուշադրություն դարբնեք, ոչ թե կոնտեքստից կտրված ինչ-որ հարցեր տաք։ Ինչ վերաբերում է ձեր ասած բառամթերքին, բառամթերքը այն է բնութագրում ինչպես իրենց պահում են այսօրվա մեր եկեղեցականները ցավոք սրտի»,–ասաց նա։

Հարցին՝ որքանո՞վ է երկրի ղեկավարին հարիր, «արա»–ով դիմել, ասել՝ «դոմփել քեռակնոջը», ասել՝ «պոռնկաբարո, սրբազան»,– ՔՊ–ականը պատասխանեց. «Ամբողջ խնդիրն այն է, որ ցավոք սրտի, մեր որոշ եկեղեցականներ ունեն այնպիսի վարքագիծ, որը ուղղակի այլ կերպ բնութագրել հնարավոր չէ։ Վարչապետը բազմիցս իր գրառումներում անդրադարձել է տարբեր դրվագներով։ Նույն մոմի հետ կապված բիզնեսին ինչի՞ ոչ ոք չի անդրադառնում»։

Ինչ վերաբերում է նրան, թե ինչպե՞ս կընդուեք, եթե ՔՊ–ի հետեւոդներից մեկը հարց բարձրացնի, թե այս կամ այն պաշտոնյան կամ պատգամավորը ում հետ է քնում, ում է «դոմփում», Միքայել Խաչատրյանը նկատեց. «Մենք չունենք կուսակրոնության ուխտ։ Ես խնդրում եմ, որ այս հարցում լինեք անաչառ, որովհետև հուսով եմ՝ դուք էլ եք Հայ առաքելական եկեղեցու հետևորդներ, և սա այն հարցն է, որ պետք է մենք հստակ գնահատականներ տանք, և հայ ժողովուրդը պետք է իրականում հասկանա, թե ինչ է կատարվում Եկեղեցում»։