Մինսկի խմբի լուծարումը Ադրբեջանի համար կարող է այլ նպատակներ հետապնդել․ Միրզոյան

Ադրբեջանի հետ Խաղաղության պայմանագրի շուրջ բանակցությունները ավարտված են և, ըստ էության, պայմանագիրը պատրաստ էր ստորագրման, որից հետո, ցավոք սրտի, տեսանք, որ ադրբեջանական կողմը մի քանի այլ նախապայմաններ ունի, այդ թվում՝ ԵԱՀԿ Մինսկի խմբի լուծարումը, ՀՀ Սահմանադրությունում  փոփոխության իրականացնելու անհրաժեշտությունը։ Այս մասին ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասի հետ համատեղ մամուլի ասուլիսի ժամանակ ասել է ՀՀ ԱԳ նախարար Արարատ Միրզոյանն՝ ընդգծելով, որ հայկական կողմը մեկ անգամ չէ, որ հայարարել է, որ Մինսկի խմբի լուծարման օրակարգը մեզ համար ընդունելի է։ 

«Միաժամանակ, հասկանալով, որ Խաղաղությունը, որը հաստատվում է, պետք է լինի ինստիտուցիոնալ կերպով, մենք դա տեսնում ենք Խաղաղության պայմանագրի ստորագրմամբ։ Հետևաբար, եթե մենք ստորագրում ենք խաղաղության պայմանագիրը կամ եթե անգամ ֆիքսում ենք այն օրը, երբ կարելի է ստորագրել Խաղաղության պայմանագիրը՝ շոշափելի , տեսանելի ապագայում, ապա կարող ենք Մինսկի խմբի լուծարման ուղղությամբ քայլեր սկսել, մյուս կողմից՝ ադրբեջանական կողմի վարանումը մեզ հիմք է տալիս մտածելու, որ Մինսկի խմբի լուծարումը Ադրբեջանի համար կարող է այլ նպատակներ հետապնդել, որոնք կարող են խաթարել մեր տարածքային ամբողջականությունը։ 

Հետևաբար, կրկին մենք ուզում ենք համոզվել, որ վերջնական համապարփակ, ինստիտուցիոնալ խաղաղություն ենք հաստատում, և այդ դեպքում Մինսկի խմբի անհրաժեշտությունը վերանում է»։ 

Անդրադառնալով Սահմանադրական փոփոխություններին՝ նա ընդգծեց, որ սա բացառապես ՀՀ ներքին օրակարգն է։ «Այդ մասին մենք խոսել ենք դեռ 2019 թ-ից։ Ըստ էության, հերթական ընտրություններից հետո կարող ենք ձեռնամուխ կլինենք այդ փոփոխությանը։ 
Այն ասպեկտով, որ ադրբեջանական կողմն է դնում հարցը,  ապա պետք է ասեմ, որ եթե Ադրբեջանի մտահոգությունները անկեղծ են և նրանք անկեղծորեն խնդիրներ են տեսնում իրենց տարածքային ամբողջականության հետ կապված,ապա այս մտահոգությունները փարատելու ամենաուղիղ ձևը խաղաղության պայմանագիրը ստորագրելն է. 

Մենք ունենք պայմանագիր, որտեղ գրված է, որ ճանաչում ենք միմյանց տարածքային ամբողջականությունը, համաձայն այն սահմանների, որ մեր երկրների միջև գոյություն է ունեցել Խորհրդային միության փլուզման պահին։ Պայմանագիրը ստորագրելուց հետո՝ պետք է գնա Սահմանադրական դատարան, Եթե ՍԴ-ն ասում է, որ սահմանների վերաբերյալ այս ձևակերպումը չի հակասում մեր սահմանադրությանը՝ հարցը լուծված է, այսինքն մեր սահմանադրությունը չի պարունակում տարածքային պահանջներ Ադրբեջանի նկատմամբ։ Եթե այլ որոշում լինի՝ այլ գործողությունների անհրաժեշտություն կառաջանա։ Սա չպետք է լինի նախապայման՝ խաղաղությունը վերջնականացնելու և պայմանաիր ստորագրելու համար»,-ասաց նա՝ հույս հայտնելով որ այդ շփումնեևրևը կհանգեցնեն պայմանագրի ստորագրման ։