Հայաստանի անվտանգության և զարգացման մոդելը պետք է կառուցվի սեփական վերլուծական ներուժի վրա․ Արմեն Այվազյան

Փաստորեն, տապալվել են ՌԴ արտաքին քաղաքականության համար պատասխանատու բոլոր պետական գերատեսչությունները՝ ՌԴ ԱԳՆ-ն, Արտաքին հետախուզության ծառայությունը (СВР), Անվտանգության դաշնային ծառայությունը (ФСБ), Գլխավոր հետախուզական վարչությունը (ГРУ) և, իհարկե, Կրեմլի համապատասխան բաժանմունքները։ Խայտառակ սխալ վերլուծություններ են տրամադրել իրենց հասարակությանը նաև ՌԴ վերլուծական-քարոզչական ճյուղավորված համակարգի բոլոր օղակները։

 

Հսկայական ռեսուրսներ ունեցող Ռուսաստանն Այսրկովկասում կրել է ջախջախիչ դիվանագիտական և համբավային պարտություն, որովհետև նրա ռազմավարության հիմքում ընկած էին սխալ հաշվարկներ, քարացած կարծրատիպեր և կոռուպցիոն կախվածություններ։ Այս ամենի մասին՝ դեռ մինչև 2020 թվականը, անձամբ ես և ուրիշները հրապարակայնորեն նախազգուշացրել ենք, սակայն ապարդյուն։ Կկարողանա՞ և կցանկանա՞ արդյոք ՌԴ-ն գոնե մասամբ շտկել իրավիճակն Այսրկովկասում՝ նախևառաջ վերականգնելով ռազմական հավասարակշռությունը Հայաստանի և Ադրբեջանի միջև — դժվար է ասել։ Ժամանակը ցույց կտա։

 

Ամեն պարագայում, ի թիվս հետագայում արվելիք այլ հետևությունների, այժմ նշեմ մեկը՝ մեզ համար անչափ կարևորը. Հայաստանի ապագա ազգային պետության անվտանգության և զարգացման մոդելը պետք է կառուցվի սեփական վերլուծական ներուժի վրա՝ առանց որևէ մեծ տերության թերի և ապակողմնորոշիչ «խորհուրդների», մանավանդ երբ խոսքը վերաբերում է ՄԵՐ անվտանգությանը։ Մեր անվտանգությունը ոչ ոք չի կարող հասկանալ և գնահատել ավելի լավ, քան մենք՝ ինքներս։