Երկրին քաղաքական փոփոխություններ են պետք, ու շատ արագ. քաղաքագետ

Քաղաքագետ Սուրեն Սուրենյանցը, անդրադառնալով 8 ամսական երեխայի մոր՝ աղմուկ հանած կալանավորման դեպքին, գրում է.

«Դատարանը 3 ամսով կալանավորել է մի քանի ամսական երեխայի երիտասարդ մորը։ 

Գործին քաջածանոթ իրավաբաններն ասում են՝ այս կինը նույնիսկ մեղադրյալ չպետք է լիներ, էլ ուր մնաց՝ կալանավոր: 

Եթե իշխանությունը օգտագործում է կալանքը ոչ թե որպես քննությանը նպաստող գործիք, այլ՝ զսպող, վախեցնող կամ պատժիչ միջոց ընդդիմախոսների, հանրային գործիչների կամ ռեժիմին անհարմար մարդկանց դեմ, ապա պետք չէ զարմանալ, որ սովորական քաղաքացիները նույնպես «ճաշակելու» են տոտալիտարիզմի «պտուղները»: 

Չի կարող մի երկրում դատական համակարգը պատժիչ ֆունկցիա կատարել ընդդիմադիրների համար և հումանիստական փոխակերպում ապրել, երբ քննում է սովորական մարդկանց վերաբերյալ գործեր: 

Չի կարող բռնապետության ճանապարհին գտնվող երկիրը հանդուրժել ԵՊՀ կամ այլ հիմնարկների ընդդիմադիր աշխատողներ, դասախոսներ, դեկաններ: 

Սա էլ է օրինաչափություն, օրինաչափություն է, երբ հանդուրժում ենք տոտալիտար կառավարումը: 

Հետևանքների դեմ պայքարելու փոխարեն՝ պետք է վերացնել պատճառը. երկրին քաղաքական փոփոխություններ են պետք: 

Ու շատ արագ»։