ԱՄՆ գանձապետարանը պատրաստվում է թողարկել մինչև $1.6 տրլն կարճաժամկետ պարտատոմսեր․ շուկան ասում է՝ «բերե՛ք»

ԱՄՆ գանձապետարանը նախատեսում է մինչև $1.6 տրիլիոն կարճաժամկետ պարտատոմսերի՝ T-bills-ի թողարկում առաջիկա 1.5 տարում՝ բյուջետային դեֆիցիտի ֆինանսավորման և կանխիկ հաշվեկշռի համալրման նպատակով։ Չնայած ծավալների մեծությանը՝ պահանջարկը բարձր է․ փողային շուկայի ֆոնդերն ունեն ռեկորդային՝ $7.4 տրլն ակտիվներ և պատրաստ են կլանել այդ առաջարկը։

«Մեծ և Գեղեցիկ Օրինագծի» շրջանակում ԱՄՆ պարտքի շեմը բարձրացվել է $5 տրիլիոնով՝ հասնելով $41.1 տրլն-ի։ Այս պահին Treasury-ն նախընտրում է թողարկել կարճաժամկետ պարտատոմսեր՝ խուսափելով բարձր տոկոսներով երկարաժամկետ վարկերից։ Թողարկման առաջին քայլերն արդեն արվել են՝ 4- և 8-շաբաթյա բիլների ծավալներն ավելացել են $25 միլիարդով։

Միաժամանակ, խնդիր է առաջանում՝ կապված Դաշնային ռեզերվի ռևերս ռեպո գործարքների կտրուկ անկման հետ, որը նախկինում ապահովում էր T-bills-ի գնման պահուստային միջոցներ։ Սակայն վերլուծաբանները վստահ են՝ փողային ֆոնդերն այժմ պարզապես կտեղափոխեն ներդրումները ռեպոներից դեպի ավելի եկամտաբեր T-bills-երը, որոնք այս պահին 3-ամսյա կտրվածքով ապահովում են 4.35% եկամտաբերություն։