Փաշինյանը չորս ժամ զբաղված էր մեր ինտելեկտի բռնաբարությամբ․ քաղաքագետ

Քաղաքագետ Սուրեն Սուրենյանցը գրում է․

«Փաշինյանը չորս ժամ զբաղված էր մեր ինտելեկտի բռնաբարությամբ 

Նիկոլ Փաշինյանի այսօրվա ասուլիսը զավեշտով, կեղծիքով, մանիպուլյացիայով հարուստ էր և մեծ հաշվով՝ փաստացի վարչապետը չորս ժամ զբաղված էր մեր ինտելեկտի բռնաբարությամբ: 

Անշուշտ, Փաշինյանի մտքի «գոհարներին» անդրադառնալու առիթ կլինի, բայց հիմա ուզում եմ խոսել ասուլիսի «ամենապոպուլյար» թեմայի՝ արտապատվիրակման մասին: 

Փաշինյանը փորձել է համեմատական անցկացնել Հայաստանի ներկայիս արտապատվիրակված ենթակառուցվածքների և Սյունիքով նախատեսված ճանապարհի միջև՝ ընդգծելով, որ երկաթուղային համակարգը, «Զվարթնոց» օդանավակայանը և ջրամատակարարման որոշ ոլորտներ նույնպես գտնվում են արտասահմանյան կառավարման ներքո, սակայն «Հայաստանի Հանրապետության տարածքային ամբողջականությունը կամ ինքնիշխանությունը դրանից չեն խախտվել»։ 

Նման համեմատություն անելու համար՝ մարդը կա՜մ կատարյալ դիլետանտ պետք է լինի, կա՛մ՝ մանիպուլյացիայի մեծագույն վարպետ: 

Ըստ իս, Փաշինյանի պարագայում այս երկու գործոնները միախառնված են: 

Հայաստանի ջրային համակարգի կամ «Զվարթնոց» օդանավակայանի կառավարման արտապատվիրակումը կատարվել է ներդրումային պայմանագրերի շրջանակում, որոնց դեպքում ՀՀ-ն պահպանում է լիարժեք իրավասություն, վերահսկողություն և իրավական գերակայություն այդ ենթակառուցվածքների նկատմամբ։ 

Սյունիքի ճանապարհի հարցում Ադրբեջանը բացահայտորեն պահանջում է ռեժիմ, որի դեպքում Հայաստանի իրավասությունները՝ մաքսային, սահմանային և անձնագրային, փաստացի չեն գործելու այդ ճանապարհի նկատմամբ։ 

Առնվազն, սահմանափակվելու է Հայաստանի ինքնիշխանությունը: 

Զանգեզուրի միջանցքի շուրջ քննարկումները ծագել են ոչ թե տնտեսական անհրաժեշտությունից, այլ՝ 2020 թվականի պատերազմից հետո Ադրբեջանի կողմից ուժի սպառնալիքով առաջ քաշված ռազմաքաղաքական պահանջների համատեքստում։ 

Այստեղ, ըստ այդ, անիմաստ է խոսել փոխադարձության համագործակցության բաղադրիչների մասին: 

Այսպիսով, գործ ունենք ոչ թե տնտեսապես շահավետ նախաձեռնության, այլ մի լուծման հետ, որը Հայաստանը դարձնում է աշխարհաքաղաքական շահեր բախման կիզակետ: 

Դարձյալ պնդում եմ, որ ուրվագծվող լուծումը շատ ավելի ռիսկային ու վտանգավոր է, քան այն ինչ նկարագրված էր Նոյեմբերի 9-ի եռակողմ հայտարարության 9-րդ կետում»: