Կատարվողը ձեզ համար կոմֆորտ զոնայի սահմաններում է․ Դավիթ Սանասարյանը՝ Փաշինյանի ասուլիսի մասին

«Այս պրոցեսը ժողովորդավարույթուն ներկայացնողներին ուզում եմ հիշեցնել, որ Պուտինն էլ է երկար ասուլիսներ տալիս։ Դա ժողովրդավարության նշան չէ, այլ դրա խեղաթյուրված իմիտացիան։

 

Օրինակ վերցրեք ԱՄՆ նախագահի ինստիտուտից։ Ամեն հարմար պահի՝ մի քանի հարց, հստակ պատասխան, ու՝ անցում գործերին, ժամանակը թանկ է։ Ժողովրդավարությունը բյուրոկրատացված շոու չէ։ Ժողովրդավարությունը արդյունավետություն է, հաշվետվողականություն, բովանդակային մենամարտ՝ ոչ թե երկարաժամկետ կրկնություն։

 

Լրատվամիջոցների գործընկերները նույնպես պետք է վերանայեն իրենց դերը։ Հարց տալը դեռ լրագրություն չէ։ Երբ հարցը պարզապես վերարտադրում է արդեն տրված պատասխանը՝ առանց ճշգրտման, խորացման կամ հակադրության, այն դադարում է լինել որպես վերահսկող գործիք։ Լրագրողական դերը հենց այստեղ է սկսվում՝ այնտեղ, որտեղ պարզ արձանագրումից անցում է կատարվում խորքային քննության։ Լրագրություն է այն պահից, երբ հարցը բերում է ղեկավարին անհարմար վիճակի՝ ստիպում է պարզաբանել, հիմնավորել, կամ վերանայել մոտեցումները։ Լրագրություն չի նաև որոշակի խմբերի պաշտպանական և քարոզչական գործիք դառնալը, դա պարզ քարոզչություն է, Չորրորդ իշխանությունը երկրի կարևոր ինստիտուտներից է, այդ իշխանությունը չպետք է հեշտ հանձնել նեղ շահեր հետապնդողներին։

 

Ժողովրդավարությունը կարող է լինել ժամանակատար, բայց չպետք է դառնա ժամանակ մսխող։

 

Հ.Գ. Շատ գործիչներ վախենում են լրատվամիջոցների վերաբերյալ կարծիք արտահայտել։ Հարգելի լրագրողներ, այո, դուք հանրային կարևոր ինստիտուտի մաս եք, և ես չեմ կարող թեթև նայել կատարվողին։ Այո, փոխադարձ թիրախավորեք ինձ, սուր հարցեր տվեք, զարգանալու, ուժեղանալու այլ տարբերակ չկա»,– գրել է նա։