Տավուշի մարզպետարանը վաղուց դարձել է Իջևանի մարզպետարան․ Ոսկան Սարգսյան

Լրագրող Ոսկան Սարգսյանը գրում է․ «Ինչո՞ւ Տավուշի մարզպետարանում միայն իջևանցիներ են աշխատում

Տավուշի մարզպետի աշխատակազմն ունի 67 աշխատող, 9 հաստիք թափուր է։ Մարզպետարանի բոլոր աշխատողները Իջևան համայնքի բնակիչներ են, մարզպետարանում Տավուշի մարզի Բերդ, Դիլիջան, Նոյեմբերյան համայնքների բնակիչներ չկան։

Տավուշի մարզպետարանը վաղուց դարձել է Իջևանի մարզպետարան:

2018 թվականի ապրիլին Իջևան քաղաքում կայացած մեծ հանրահավաքում Նիկոլ Փաշինյանը հայտարարեց, որ նոր Հայաստանում խնամի-ծանոթ-բարեկամով պաշտոնների չեն ստանալու, կապ չի ունենալու՝ մարդը իջևա՞նցի է․ ղարաբա՞ղցի, գյումրեցի է։ Սակայն նրա ասածի լրիվ հակառակը եղավ։

Նիկոլ Փաշինյանի դասընկեր, նրա հարսանիքի քավոր, Ն․ Փաշինյանի որոշմամբ 2021թ․ ապրիլի 8-ին Տավուշի մարզպետ նշանակված Հայկ Ղալումյանին հարցում եմ արել․ «Ե՞րբ է Տավուշի մարզպետի աշխատակազմն ունենալու Տավուշի մարզի, սակայն ոչ Իջևան համայնքի բնակիչ գոնե մեկ աշխատակից»։

Մարզպետարանից պատասխանել են․ «ՀՀ Տավուշի մարզպետի աշխատակազմում քաղաքացիական ծառայության թափուր պաշտոնները համալրվում են մրցույթի արդյունքով: Թափուր պաշտոնները համալրելու համար հայտարարությունները հրապարակվում են քաղաքացիական ծառայության տեղեկատվական հարթակում և դիմորդները դիմումները ներկայացնում են քաղաքացիական ծառայության տեղեկատվական հարթակով: Հայտարարության մեջ բնակության վայրի պահանջ ըստ գործող օրենսդրության ամրագրված չէ»։