Միայն ակնածանքով և խորը որդիական երախտագիտությամբ կարող եմ խոսել Գերաշնոր Տեր Միքայել արքեպս․ Աջապահյանի մասին. Տեր Հակոբոս քահանա

Տեր Հակոբոս քահանա Իսահակյանը գրում է.

 

Սիրելինե՛ր, հինգ և ավել տարիներ որպես Միքայել Սրբազանի քարտուղար աշխատելով և ծառայելով Շիրակի թեմում, միայն ակնածանքով և խորը որդիական երախտագիտությամբ կարող եմ խոսել Գերաշնոր Տեր Միքայել արքեպս․ Աջապահյանի մասին։ Իր ներկայության յուրաքանչյուր վայրկյանը համեմված է եղել սիրով և հայրական խնամքով։

 

Մարդ ով անձնուրաց կերպով առավելաբար մտածել և հոգացել է դիմացինի և հայրենյաց մասին, քան սեփական եսի։ Խորը հավատքով և առ Աստված բարձրագույն նվիրումով հոգևորական։ Ճշմարտության հանդեպ անսակարկ, ոչ դիվանագիտորեն սեփական եսի նկատմամբ, այլ անձնուրաց՝ ճշմարտության հաղթանակի և Աստծո փառքի հանդեպ։ Մարդ ով միտված է բարձրացնելու, խնամելու, փրկելու, ով խորը ցավի զգացում ունի կորուստի, չարի հաջողության հանդեպ և ով թերևս լուռ, բայց ներքին մեծ ուրախություն է ապրում յուրաքանչյուրի հաջողության, առ Աստված առաջադիմության գործում։

 

Աստծո կենդանի տաճար, իմաստության և հանճարի բնակարան, ով այսօր չարափառների կողմից ձերբակալվել և բանտարկվել է։ Աստծով ազատագրված մարդուն բանտը սարսափելի չէ, բայց մեր ողբերգություն ու ցավն է, որ Աստծունը և Աստվածային պարգևները ըստ արժանվույն չենք կարողանում գնահատել։

Գիտեք Աստված բոլորին հավասար շնորհներ չի տալիս, բայց ասում է, մարգարեին որպես մարգարե ընդունողը մարգարեի վարձք կստանա։ Ուրեմն հրեաների պես մարգարեներին սպանողների դասին չարժանանանք, և դրանով մեր ու մեր ազգի գլխին անեծք և պատուհասներ չկուտակենք, այլ մեզ Աստծո կողմից պարգևած գանձերը սրբությամբ պահենք ու պահպանենք և չարն ու բարին իրարից կարողանանք զատորոշել։

 

Այսպիսով ոչ անտարբերությամբ, ոչ պիղատոսյան ախտով և ոչ էլ Տիրադավներին միանալով չանարգենք մեզ բաժին հասած օրհնությունը, այլ կարողանանք զատորոշել հայրական գավազանը թշնամու սրից և հոգու արթնությամբ զորակցենք հայրական բազկին։

 

Աստված օգնական սիրելի Սրբազան Հայր, Ձերդ Սրբազնության ազատությունը մեր որդիական պարտականությունն է։