Ինձ հույս էին տվել, որ հայ-թուրքական հարաբերությունները կարող են կարգավորվել. Արսեն Թորոսյան

ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի գրառումը․ «Ինչքա՞ն կարելի է ատել սեփական պետությունն ու ժողովրդին, որպեսզի ունակ լինես քննադատել ցանկացած՝ բառի բուն իմաստով ցանկացած ձեռքբերում, և հատկապես դրանցից նշանակալիցները։

Ես էլ եմ եղել ընդդիմություն նախորդ իշխանություններին և քննադատել եմ նրանց սխալներն ու թերությունները, բայց նաև նկատել և ողջունել եմ ձեռքբերումները։
Վերջին օրերի իրադարձությունների ֆոնին ուզում եմ հիշել Սերժ Սարգսյանի ֆուտբոլային դիվանագիտությունը և հայ-թուրքական արձանագրությունները, որոնք, թեև ի վերջո ձախողվեցին, բայց կոնկրետ ինձ հույս էին տվել, որ հայ-թուրքական հարաբերությունները կարող են կարգավորվել։ Եվ ես միայն ողջունել եմ այդ գործընթացը. եթե ինչ-որ կերպ կարողանայի օգնել, ապա կօգնեի, որպեսզի այն հաջողություն ունենար։

Իսկ այսօրվա ընդդիմությունը, որոնց մեծ մասը նույն մարդիկ են և նրանց արբանյակները, ատելությամբ լցված սեփական երկրի և ժողովրդի նկատմամբ, տեղեկատվական գրոհներով, լկտի ստերով և մանիպուլյացիաներով անխնա քննադատում են մի գործընթաց, որը խաղաղություն և բարեկեցություն է բերելու մեզ բոլորիս։
Այդ ատելությունը նրանց ներսից խժռում է, բայց նրանք դա էլ չեն հասկանում»։