Վաշինգտոնյան համաձայնություններից շահել են ԱՄՆ–ը, Ադրբեջանը, Թուրքիան և Նիկոլ Փաշինյանը, տուժել է Հայաստանը․ Թևանյան

«Վաշիգտոնյան կոնսենսուս» հայտնի բանաձևը երեկվանից ունի նաև աշխարհաքաղաքական բացատրություն։ Իր ֆեյսբուքյան էջում գրել է «Մայր Հայաստան» շարժման առաջնորդ Անդրանիկ Թևանյանը։ 

 

«Վաշինգտոնյան համաձայնություններից շահել են ԱՄՆ–ը, Ադրբեջանը, Թուրքիան և Նիկոլ Փաշինյանը։ Տուժել է Հայաստանը, որը դարձել է Սիրիա, որտեղ բախվում էին աշխարհաքաղաքական ու տարածաշրջանային սուբյեկտների իրարամերժ շահերը։ Թե ինչի դա կարող է հանգեցնել փոքրիկ Հայաստանի դեպքում, կարելի է պատկերացնել Արցախի ճակատագրին նայելով, Սիրիայում տեղի ունեցածին հետևելով ու «Վաշինգտոնյան կոնսենսուսի» մասով Իրանի արտգործնախարարության հայտարարությունը կարդալով։ Կամ էլ՝ նախորդ դարասկզբին ընդունված Սևրի պայմանագրին ծանոթանալով։

 

Ափսոս էին տղերքը, ափսոս էր Արցախը, ափսոս է Հայաստանը։

 

Հ․Գ․ Ներքաղաքական պայքարը կորցնում է իր դասական ձևը։ Ստանդարտ ու ապաքաղաքական մոտեցումները պետք է բացառվեն։ Դեբիլություններն ու էժանագին գզվռտոցները պետք է դատապարտվեն։ Պայքարը պետք է դառնա գերքաղաքական, գերազգային, գերմոտիվացված, գերկազմակերպված։ Պայքարը հանուն Հայաստանի Հանրապետության պետք է լինի։

 

Հ․Հ․ Գ․ Ղարաբաղյան շարժումն անփառունակ վախճան ունեցավ։ Նիկոլ Փաշինյանը, հանուն իր իշխանության ու կաշվի փրկության, դրսի օժանդակությամբ թաղեց 88–ի ձեռքբերումների մեծ մասը։ Մնացել է միայն ՀՀ անկախությունը, այն էլ՝ խիստ խոցելի վիճակում։

 

Հիմա միայն ՀԱՅԱՍՏԱՆՅԱՆ ՇԱՐԺՈՒՄԸ մեզ կփրկի։ Հայաստանի օրակարգից դուրս այլ օրակարգ չի կարող լինել»,– գրել է նա։