Ինչ անել, եթե տարածքում կա այրվող աղբանոցից առաջացած մեգ․ Քրիստինա Վարդանյան

Երևանի Ավագանու անդամ Քրիստինա Վարդանյանը գրում է.

«Առավոտյան կրկին ծուխ էր և ստացա տասնյակ երևանցիներից ահազանգեր։

Հուսանք, որ քաղաքային իշխանությունը, ի վերջո, խնդրին արժանի լուծում կտա։

Տարօրինակ է, որ առողջապահության նախարարությունը՝ օդի հետ կապված, ասելիք չունի, միգուցե սեղանին աղամանի բացակայությունը, ինչը ծավալուն և զանգվածային լուսաբանվեց, ավելի մեծ ազդեցություն ունի բնակչության առողջության վրա, քան նորածնից մինչև ամենատարեցի կյանքին սպառնող օդի որակը։

Կհիշեք, իշխանությունը մեզ ասում էր, որ մեգը Երևանում միայն ձմռան խնդիր է, հարգելիներս, իսկ հիմա տարվա ո՞ր եղանակն է։

Ինչ անել, եթե տարածքում կա այրվող աղբանոցից առաջացած մեգ․

• Հեռացեք ծխի տարածքից, եթե դա հնարավոր է, հատկապես երբ քամին ծուխը բերում է դեպի ձեզ։

• Փակեք պատուհանները, դռները տանը կամ աշխատավայրում։

• Եթե դրսում եք, օգտագործեք FFP2 կամ FFP3 դասի շնչադիմակ, բացակայության դեպքում՝ խոնավ շորով փակեք քիթն ու բերանը։

• Խուսափեք ֆիզիկական ծանրաբեռնվածությունից՝ որպեսզի չավելացնեք շնչառական ծավալը։ Հիշեք նաև, որ առավոտյան ժամերին՝ օդի աղտոտման մասով, ամենածանր վիճակն է։

• Ավելացրեք ընդունվող ջրի քանակը, որպեսզի օրգանիզմը կարողանա արագ դուրս բերել թունավոր նյութերը։

• Ուշադրություն դարձրեք ձեր ինքնազգացողությանը՝ հազ, շնչահեղձություն, գլխացավ կամ աչքերի գրգռում նկատելու դեպքում դիմեք բժշկի։