Բնապահպանները պատրաստ են գնել Թեղուտ գետը

«Սարդարապատ» շարժման անդամ, ռեժիսոր Տիգրան Խզմալյանը, երեկ, ֆեյսբուքյան իր էջում «աճուրդ» է հայտարարել՝ վերացման ենթակա Թեղուտ գետը գնելու համար։ Գետը փրկելու համար, որը «Վալլեքս» ընկերության կողմից գնահատվել է 170 հազար դրամ, Տ. Խզմալյանը, «Սարդարապատ» շարժման նախաձեռնող խմբի անդամ Գարեգին Չուգասզյանը առաջարկել են 180 հազար դրամ։ Արդեն հաջորդ հաղորդագրությամբ ռեժիսորը հայտնում է, որ կես ժամվա մեջ գումարը հասել է կես միլիոն դրամի և բաց հաշվեհամար է առաջարկվել։ 

Ինչպես ԼՈԻՐԵՐ.com–ի թղթակցի հետ զրույցում նշեց նախաձեռնության մասնակիցներից Գարեգին Չուգասզյանը, իրենք պատրաստ են գնել ոչ միայն Թեղուտ գետը, այլև Հայաստանի բոլոր գետերը և ծառերը հատ–հատ։ Իսկ այն հարցին, թե որքան են պատրաստ վճարել գետի դիմաց, Գ. Չուգասզյանը նշեց. «Թող իրենք ասեն, որքանով են պատրաստ վաճառել գետը, մենք այդ փողը կտանք»։ Վերջինս նաև  մանրամասնեց, որ ցանկացած մեծության գումար չի կարող նշվել, քանի որ, ի սկզբանե ընկերությունը գետը գնահատել է 160 հազար դրամ։ Գ. Չուգասզյանը նաև նշեց, որ իրենց առաջարկին ընկերությունն արդեն տեղյակ է, բայց արձագանքներ դեռևս չեն եղել։

Նշենք նաև, որ գետի արժեքը գնահատելիս «Վալլեքսը» հիմք է ընդունել դրանում եղած ձկան շուկայական գինը։