Թրամփը կրկին ուռճացրեց Ուկրաինային ԱՄՆ օգնության չափը՝ Զելենսկու հետ հանդիպման ժամանակ

Վաշինգտոնում Ուկրաինայի նախագահ Վլադիմիր Զելենսկու հետ հանդիպման ընթացքում Դոնալդ Թրամփը մամուլին հայտարարեց, թե Միացյալ Նահանգները Կիևին տրամադրել է ավելի քան 300 միլիարդ դոլարի աջակցություն, անգամ նշելով 350 միլիարդի թիվ։ Սակայն ըստ գերմանական Kiel ինստիտուտի տվյալների, 2022-ի սկզբից մինչև 2025-ի հունիս ԱՄՆ-ն հատկացրել է մոտ 134 միլիարդ դոլար, իսկ ԱՄՆ վերահսկիչ մարմինները խոսում են առավելագույնը շուրջ 185 միլիարդի մասին։ Թրամփի նշած թիվը, ըստ փորձագետների, հիմնավորված չէ։

CNN-ը նշում է, որ Թրամփի վարչակազմը փորձել է հաշվարկին «ավելացնել» նաև այնպիսի գործոններ, ինչպիսիք են ԱՄՆ-ում ինֆլյացիան, Ռուսաստանի դեմ պատժամիջոցների հետևանքով արտահանման կրճատումը և պարարտանյութերի գների աճը։ Մասնագետները դա որակել են որպես ոչ լուրջ «մաթեմատիկա», քանի որ այդ ցուցանիշները որևէ կերպ չեն վերաբերում Ուկրաինային ուղղված օգնությանը։

Թրամփը հանդիպման ընթացքում կրկնել է նաև փոստային քվեարկության մասին իր վաղեմի պնդումները՝ այն անվանելով «կոռումպացված» և հայտարարելով, թե միայն ԱՄՆ-ում է կիրառվում այդ համակարգը։ Իրականում փոստային քվեարկությունը կիրառվում է տասնյակ երկրներում, ներառյալ Կանադան, Գերմանիան ու Մեծ Բրիտանիան։ Ընտրական փորձագետները ընդգծում են, որ հնարավոր չարաշահումները նվազագույնի են հասցվում, իսկ լայնածավալ կեղծիքներ ԱՄՆ դաշնային ընտրություններում երբեք չեն արձանագրվել։