Ի՞նչ կպատահի, եթե Թրամփը վերահսկի ԱՄՆ Դաշնային ռեզերվը․ պատմական նախազգուշացումներ ԱՄՆ-ի և աշխարհի համար

ԱՄՆ նախագահ Դոնալդ Թրամփի քննադատությունները Դաշնային ռեզերվի ղեկավար Ջերոմ Պաուելին և փորձը՝ հեռացնել կառույցի անդամ Լիզա Կուքին, մտահոգություններ են առաջացրել 111-ամյա կենտրոնական բանկի անկախության շուրջ։ Տնտեսագետներն ու նախկին բարձրաստիճան պաշտոնյաները նախազգուշացնում են, որ նման քայլերը կարող են խաթարել ներդրողների վստահությունը, բարձրացնել ինֆլյացիոն սպասումները և վտանգել դոլարի կայունությունը։ Նախադեպեր արդեն կան․ 1970-ականներին Ռիչարդ Նիքսոնի ճնշումների տակ Ֆեդի սխալ քաղաքականությունը բերեց ինֆլյացիոն ճգնաժամի, իսկ Թուրքիայի և Արգենտինայի փորձը ցույց է տալիս, թե ինչ ծանր հետևանքներ է ունենում կենտրոնական բանկի կախվածությունը իշխանություններից։

Թրամփը պնդում է, որ տոկոսադրույքների կրճատումը կնպաստի տնտեսական աճին և կթեթևացնի բեռը ամերիկյան ընտանիքների վրա։ Սակայն փորձագետները զգուշացնում են, որ քաղաքական միջամտությունը դրամավարկային քաղաքականությանը կարող է ունենալ հակառակ արդյունք։ Թուրքիայում Ռեջեփ Էրդողանի ճնշումները կենտրոնական բանկի վրա բերեցին գերբարձր ինֆլյացիայի և ազգային արժույթի փլուզման։ Արգենտինայում էլ տարիներ շարունակ կենտրոնական բանկը տպում էր փող՝ դեֆիցիտը ֆինանսավորելու համար, ինչը հանգեցրեց հիպերինֆլյացիայի։ Միայն վերջին տարիներին նոր իշխանությունը ստիպված վերադարձավ անկախ քաղաքականությանը՝ զսպելու գնաճը։

Տնտեսագետները նշում են, որ Ֆեդի նկատմամբ վստահության կորուստը կարող է շատ ավելի ծանր հետևանքներ ունենալ ԱՄՆ-ի համար, քան Թուրքիայում կամ Արգենտինայում։ ԱՄՆ-ն ունի երկակի դեֆիցիտ, արտաքին մեծ պարտքեր և օտարերկրյա ներդրողների հսկայական մասնաբաժին ամերիկյան ակտիվներում։ Եթե կասկած առաջանա, որ Դաշնային ռեզերվը անկախ չէ, դա կարող է սրել գլոբալ ճգնաժամը։ Ինչպես զգուշացնում են վերլուծաբանները, անգամ եթե Ֆեդը որոշումներ կայացնի տվյալների հիման վրա, դրանք միշտ ընկալվելու են որպես քաղաքականորեն պայմանավորված․ վստահությունը հեշտ է կորցնել, բայց դժվար վերականգնել, հայտնում է CNN-ը։