Ժողովուրդն ընդդեմ Վովա Գասպարյանի

«Ֆեյսբուք» սոցիալական ցանցում ստեղծվել է «Ժողովուրդն ընդդեմ Վովա Գասպարյանի» նախաձեռնությունը: Նախաձեռնության հեղինակն է «Բանակն իրականում» քաղաքացիական նախաձեռնության և համանուն ֆեյսբուքյան խմբի անդամ Լալա Ասլիկյանը:

Հունվարի 24-ին, Կենտրոն և Նորք-Մարաշ ընդհանուր իրավասության դատարանում կքննվի Հելսինկյան ասամբլեայի Վանաձորի գրասենյակի հայցը ընդդեմ ոստիկանապետ Վլադիմիր Գասպարյանի: Հայցի պատճառը Վլադիմիր Գասպարյանի դեռևս պաշտպանության փոխնախարարի կարգավիճակում տված հարցազրույցներն են: Նախկին փոխնախարարը և ներկայիս ոստիկանապետը «Հրապարակ» օրաթերթին տված հարցազրույցում կառավարության շենքի մոտ բողոքող որդեկորույս մայրերի, սգավոր հարազատների, բանակում առկա խնդիրներով մտահոգ քաղաքացիների ու իրավապաշտպանների հասցեին ասել էր. «Ցավացող ծնողը լկտի չի լինի, ցավացող ծնողը կանգնած է, բայց ես տեսնում եմ լկտիություն բանակի նկատմամբ, նախարարի նկատմամբ, ես տեսնում եմ թույն մեջները: 20 տարեկան պոչիկներով լակոտներին, որ բերել են Հելսինկյան կազմակերպությունները, ու էդ լակոտների բերանների արտահայտություններն անձնական վիրավորանք են հասցնում: Երբ փսլնքոտ լակոտը երկիր պահած, երկրի համար տուժած մարդուն վիրավորում է լկտի բացականչություններով, ես դա չեմ հանդուրժելու»:

Իսկ «Զինուժ» ծրագրին տված հարցազրույցում այսպես էր խոսել պարոն Գասպարյանը. «Ո՞նց կարող է ցավալ մարդու սիրտ մի երկրի բանակի համար, երբ ֆինանսավորվում ու աշխատավարձ է ստանում ուրիշ երկրներից: Ոնց կարող է մարդու սիրտ ցավա, երբ նա մտածում է՝ ինչքան աղմկահարույց, ինչքան վատ դեպք պատահի, էնքան լավ է, որովհետև դրա վրա ավելի շատ փող կարող է աշխատի: Այդ մարդիկ, ովքեր դրանով զբաղվում են անհայրենիք, աներկիր, անշնորհք, ուրիշին դուր գալու, ուրիշին ծառայելու, նոքարի, սեփական արժանապատվությունը չունեցող երևույթներ են: Նրանց մեջ մարդիկ կան, ովքեր բանակի կողքով անգամ չեն անցել»: Նախաձեռնության պատին մեջբերված այս հատվածներին հավելենք, որ Գասպարյանը «Հայլուր» լրատվականի պատրաստած նյութի մեջ էլ հայտարարել էր, թե նախարարին թույլ ասողը «թուլա է»:

Ֆեյսբուքյան նախաձեռնության պատին մի հատված է մեջբերված հայցվորի՝ Հելսինկյան քաղաքացիական ասամբլեայի Վանաձորի գրասենյակի հայցադիմումի պահանջից. «Վլադիմիր Գասպարյանի նման հայտարարությունները զրպարտություն են, որը իր մեջ պարունակում է վիրավորանք և վնաս է հասցնում մեր կազմակերպության գործարար համբավին, արժանապատվությանը և միաժամանակ ՀՀ զինված ուժերում որդիներ կորցրած ծնողներին: Մեր կազմակերպությանը և ՀՀ կառավարության շենքի դիմաց բողոքի ակցիա կազմակերպած ՀՀ զինված ուժերում որդիներ կորցրած մայրերին վիրավորանք հասցնելու համար պատասխանող Վլադիմիր Գասպարյանին պարտավորեցնել հրապարակայնորեն ներողություն խնդրել և նրանից հօգուտ մեր կազմակերպության բռնագանձել 10 (տասը) ՀՀ դրամ՝ բռնագանձումը տարածելով նրա գույքի վրա: Վլադիմիր Գասպարյանին՝ մեր կազմակերպությանը և ՀՀ կառավարության դիմաց բողոքի ակցիա կազմակերպած ՀՀ զինված ուժերում որդիներ կորցրած մայրերին զրպարտելու համար պարտավորեցնել լրատվական նույն միջոցով հրապարակայնորեն հերքել զրպարտություն համարվող փաստացի տվյալները եւ նրանից հօգուտ մեր կազմակերպությանը բռնագանձել 10 (տասը) ՀՀ դրամ՝ բռնագանձումը տարածելով նրա գույքի վրա» :