Փաշինյանի դեմ ակցիաներ կազմակերպող Լիաննա Պետրոսյանը Վաղարշապատի ընտրություններից առաջ արցախցիներին կանչել է ՔՊ-ի համայնքապետի թեկնածու հետ հանդիպման. լրագրող

Արցախի շրջափակման օրերին Նիկոլ Փաշինյանի դեմ բողոքի ակցիաներ կազմակերպող Լիաննա Պետրոսյանը Վաղարշապատի ընտրություններից մեկ ամիս առաջ Խոյի և Վաղարշապատի արցախցիներին կանչել է ՔՊ-ի համայնքապետի թեկնածու Արգիշտի Մեխակյանի հետ հանդիպման: Այս մասին գրել է լրագրող Լիա Սարգսյանը:

«Հանդիպումը նախընտրական քարոզարշավ է, փաստացի արցախցիներին օգտագործում են՝ քվե ստանալու համար, և այս կեղտոտ գործին միացել է Արցախից տեղահանված Լիաննա Պետրոսյանը:

Ներկա արցախցիների մեծ մասը առհասարակ տեղյակ չեն, թե ինչ հանդիպում է, ում հետ է, ասում են՝ զանգել են, կանչել մշակույթի պալատ: Մի արցախցի կին անկեղծացավ՝ այլևս որևէ ակնկալիք չունի այս իշխանությունից, միակ երազանքն է՝ վերադառնալ Արցախ: Մի քանի արցախցի էլ խոստովանեցին՝ ինչ խոստում էլ ստանան՝ ՔՊ-ին չեն ընտրելու:

ՔՊ-ական իշխանությունը, որ ջնջել է Արցախը հայոց պատմության էջերից, խորշում է անգամ արտաբերել Արցախ բառը՝ այն համարելով Ադրբեջանի տարածքային ամբողջականություն, ատելություն է սերմանում արցախցիների նկատմամբ, թիրախավորում նրանց, ընտրություններից առաջ փորձելու է օգտագործել մեր հայրենակիցներին՝ իշխանությունը պահելու համար:

Սա ոչ միայն քաղաքական անբարոյականություն է, այլև հերթական ապացույցն այն փաստի, որ գործող իշխանության համար արցացիների ճակատագիրը ոչ մի արժեք չունի»,- գրել է նա։