Ռուսական սառեցված ակտիվների օգտագործումը Գերմանիայի «Պլան Բ-ն» է․ Bloomberg

Գերմանիան փոխել է դիրքորոշումը և աջակցել ռուսական սառեցված ակտիվներից ստացված եկամուտների փոխանցմանն Ուկրաինային։ Այս մասին հայտնում է Bloomberg-ը՝ հղում անելով իր աղբյուրներին։

«Գերմանիան ակտիվներից ստացված շահույթն առավելագույնի հասցնելու վճռական կողմնակիցն է դարձել» - ասվում է նյութում: Պարբերականը նշել է՝ գերմանական իշխանությունները զգուշությամբ են վերաբերվել այս հարցին՝ հանդես գալով Եվրոպայի ֆինանսական կենտրոնի պաշտպանության և պետական սեփականության անձեռնմխելիության օգտին:

Սակայն նրանք փոխել են իրենց դիրքորոշումը, քանի որ մտավախություն ունեն, որ ԱՄՆ-ի կողմից Ուկրաինային աջակցության հնարավոր թուլացումը կընկնի Գերմանական տնտեսության վրա, ինչը կարող է էլ ավելի խթանել ծայրահեղ աջ ուժերի վերելքը Գերմանիայում։ Նշվում է՝ այդ քայլը չի հանգեցնի ուղղակի բռնագրավման, որը շարունակում են պնդել ԱՄՆ-ն և Արևելյան Եվրոպայի որոշ երկրներ: