ԱՄՆ-ը միլիարդավոր ներդրում է անում՝ հրաժարվելու ռուսական ուրանից

ԱՄՆ իշխանությունները հայտարարեցին 1,5 միլիարդ դոլարի ներդրման մասին՝ սեփական պաշտպանական կարիքների համար միջուկային վառելիքի արտադրությունը զարգացնելու նպատակով։ Պայմանագիրը ստացել է BWX Technologies ընկերությունը, որը պետք է ապահովի ներքին հզորություններ ուրանի հարստացման համար։ Նոր գործարանը կտեղակայվի Տեննեսի նահանգի Էրվին քաղաքում։

BWX Technologies-ը նախկինում արդեն ստացել էր 2,6 միլիարդ դոլարի պատվեր՝ արտադրելու բաղադրիչներ ԱՄՆ ռազմածովային ուժերի համար նախատեսված ատոմային սուզանավերի և ավիակիրների համար։ Այժմ ընկերությանը վստահվել է նաև ցածր հարստացված ուրանի մատակարարումը տրիտիումի արտադրության և բարձր հարստացված ուրանի մատակարարումը՝ նավատորմի միջուկային շարժիչների համար։

ԱՄՆ էներգետիկայի նախարար Քրիս Ռայթը, ելույթ ունենալով ՄԱԳԱՏԷ-ի համաժողովում, նշեց, որ ամբողջովին հրաժարվել ռուսական ուրանից դեռևս անհնար է, սակայն այդ պահը մոտենում է։ Նրա խոսքով՝ ԱՄՆ-ում աճում է ուրանի պահանջարկը թե՛ խոշոր, թե՛ փոքր մոդուլային ռեակտորների համար, ուստի առաջիկայում մեծապես կաճեն ներքին պաշարներն ու ուրանի հարստացման հզորությունները։