Արցախի հարցը փակված չի կարող համարվել, քանի դեռ Արցախի ժողովուրդը զրկված է իր հայրենիքից. Սամվել Շահրամանյան

Ինն ամիս տևած շրջափակմանը հաջորդեց հարձակումը։ Սեպտեմբերի 19-ին, ժամը 13:07-ին, սկսվեց Ստեփանակերտի հրետակոծությունը՝ նորից բորբոքելով երբեք չմարված պատերազմը։

Ադրբեջանի կողմից Արցախի օկուպացիայի և հայկական բնակչության հարկադրական տեղահանության երկրորդ տարելիցին Արցախի իշխանությունների ներկայացուցիչներն ու Հայաստանի Ազգային ժողովի պատգամավորները այցելեցին Եռաբլուր՝ հարգանքի տուրք մատուցելու։

Ներկաները ծաղիկներ խոնարհեցին և հարգեց Արցախի պաշտպանական մարտերում նահատակված հայերի հիշատակը։ Եռաբլուրում ունեցած ելույթում Արցախի նախագահ Սամվել Շահրամանյանը ընդգծեց․

«Արցախի վերադարձի հարցը ոչ միայն արցախցիների խնդիրն է, այլև համահայկական։ Մենք սպասում ենք համազգային կոնսենսուսի, որը, ցավոք, այսօր չկա։ Արցախի հարցը փակված չի կարող համարվել, քանի դեռ Արցախի ժողովուրդը զրկված է իր հայրենիքից, իր գերեզմաններից և սրբավայրերից։ Վաղ թե ուշ այս ամենը պետք է ստանա իր արժանի գնահատականը»:

Նա նաև անդրադարձավ Արցախի քաղաքական և ռազմական ղեկավարության բանտարկությանը՝ նշելով, որ Հայաստանի իշխանությունները ոչ հանդիպում են ունեցել նրա հետ, ոչ էլ քննարկումներ են նախաձեռնել այդ հարցով։

Եռաբլուրում «Հայորդի» հիմնադրամի կամավորները ծաղիկներ հանձնեցին իրենց հարազատների գերեզմաններին այցելող քաղաքացիներին։

301-ի թղթակից։ David Ghahramanyan