ԿԳՄՍ նախարարը և Ժիլբեր-Լյուկ Դըվինազը քննարկել են հայ-ֆրանսիական համագործակցությանը վերաբերող հարցեր

ՀՀ կրթության, գիտության, մշակույթի և սպորտի նախարար Ժաննա Անդրեասյանն ընդունել է Ֆրանսիայի Սենատի՝ Հայաստան-Ֆրանսիա բարեկամական խմբի նախագահ Ժիլբեր-Լյուկ Դըվինազի գլխավորած պատվիրակությանը: Հանդիպմանը ներկա է եղել նաև ԿԳՄՍ նախարարի տեղակալ Արթուր Մարտիրոսյանը: Այս մասին տեղեկացնում են ԿԳՄՍՆ-ից:

Ողջունելով պատվիրակությանը՝ ԿԳՄՍ նախարար Ժաննա Անդրեասյանը նշել է, որ բարձր է գնահատում Հայաստանի և Ֆրանսիայի միջև համագործակցությունը կրթության, գիտության, մշակույթի, սպորտի և երիտասարդության բնագավառներում:

Նախարարը հատկապես անդրադարձել է Հայաստանի պատմության թանգարանում Լուվրի հետ գործակցությամբ բացված «Սրբազան երկխոսություն․ Լուվրից Հայաստանի պատմության թանգարան» խորագրով միջազգային ցուցադրությանը, ֆրանսիական կողմի հետ Հայաստանի ազգային պատկերասրահի համագործակցությանն ու մշակույթի ոլորտում առաջիկա նախաձեռնություններին:

Կարևորելով համագործակցությունը նաև կրթության ոլորտում՝ Ժաննա Անդրեասյանն ընդգծել է Հայաստանում ֆրանսիական համալսարանի, Ֆրանս-հայկական մասնագիտական ուսումնական կենտրոնի, Անատոլ Ֆրանսի անվան ֆրանսիական կրթահամալիրի գործունեության զարգացմանն ուղղված համագործակցային աշխատանքների կարևորությունը: Առանձնակի շեշտվել է ՀՀ հանրակրթական ուսումնական հաստատություններում ֆրանսերենի ուսուցման խթանումն ու դասավանդողների վերապատրաստման ծրագրերի արդյունավետության և շարունակականության ապահովումը: Նախարարը նշել է նաև 2027 թվականի Ֆրանկոֆոնիայի 10-րդ խաղերը Հայաստանում հյուրընկալելու փաստը՝ ընդգծելով ֆրանսիական փորձի տեղայնացման կարևորությունը:

Կողմերի միջև քննարկվող թեմաներից էր նաև կրթության և մշակույթի (հնագիտության) ոլորտներում Հայաստանում գինեգործության զարգացման համատեղ ծրագրերի իրականացման հնարավորությունը: Այս համատեքստում նախարարը նշել է, որ Հայաստանի ազգային ագրարային համալսարանի և ֆրանսիական բուհերի միջև կա ուղղությունը զարգացնելու վերաբերյալ պայմանավորվածություն: Նշվել է նաև «Արենի 1» քարայրի տարածքում հնագիտական պեղումներ կատարելու, գինեգործության ոլորտում մշակութային ժառանգությունը հանրահռչակելու կարևորությունը:

Ժիլբեր-Լյուկ Դըվինազը շնորհակալություն է հայտնել ընդունելության համար՝ վերահաստատելով քննարկվող թեմաների կյանքի կոչման ուղղությամբ համագործակցելու պատրաստակամությունը:

Հանդիպման ընթացքում քննարկվել են նաև երկուստեք հետաքրքրություն ներկայացնող այլ հարցեր: