Ոչ ոք չի նայելու մեղավորները ՔՊ–ական են, թե այլ կուսակցական․ ՔՊ–ական պատգամավոր

«Նախաքննություն լինի՝ կպարզվի, ոչ ոք չի նայելու մեղավորները ՔՊ–ական են, թե այլ կուսակցական»։ Այս մասին լրագրողների հետ զրույցում ասել է ԱԺ ՔՊ խմբակցության պատգամավոր Նարեկ Ղահրամանյանը։

Հարցին՝ ձեր իշխանության բացթողումը չէ՞, որ երկրում կրիմինալն աճում է, նա պատասխանեց․ «Չեմ կարծում, որ կրիմինալն աճում է, բայց նման դեպքեր լինում են, ցավոք սրտի»,– ասել է նա՝ որպես դրա պատճառ նշելով անհանդուրժողականությունը։

Պատգամավորը նշել է, որ տեղյակ է Սյունիքում երկու դեպքի մասին, որոնք, ամենայն հավանականությամբ, կավարտվեին այն ելքով, ինչ Մերձավանում, բայց ՆԳՆ ջանքերի շնորհիվ դա կանխվել է։ «Իսկ այս դեպքում չի կանխվել, որովհետև ընդհանուր իրավապահ համակարգի կողմից թերացում է եղել ․․․ բայց ամեն անգամ քաղաքական իշխանությանը մեղադրելն աբսուրդ է»,– ասել է Ղահրամանյանը։

Հիշեցնենք՝ սեպտեմբերի 23-ին՝ ժամը 23.52-ին, ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ 
 
Մահացածներից մեկը Փարաքար համայնքի ղեկավար Վալոդյա Գրիգորյանն է, երկրորդ զոհը քրեական ոստիկան Կարեն Աբրահամյանն է: 

ՆԳՆ մամուլի խոսնակ Նարեկ Սարգսյանը հայտնել է, որ ոստիկանը ծառայության մեջ չի եղել, պարզապես այդ պահին Վալոդյա Գրիգորյանի հետ է եղել. նրանք ընկերական հարաբերություններ են ունեցել:

Մերձավանի կրակոցների և սպանությունների դեպքի առթիվ նախաձեռնվել է քրեական վարույթ։