«Բազմաթիվ նամակներ եմ ստանում, թե ձեզ պետք է «գյուլլել», ավտոդ պայթեցնել»․ էկոնոմիկայի նախարար

Ես բազմաթիվ նամակներ եմ ստանում, հրապարակում եմ անում ու ինչ–որ մեկը գրում է, թե ձեզ պետք է սպանել, ձեզ պետք է «գյուլլել», ավտոդ պայթեցնել ․․․ Երբեմն մենք էլ ենք մեղավոր։ Երևի ճիշտն այն է, որ բոլոր դեպքերով ուղարկենք դրանք իրավապահ մարմիններին։ Մտնում ես, տեսնում ես՝ ֆեյք օգտահաշիվ է կամ արտասահմանյան ինչ–որ երկրից է գրում։ Այս մասին լրագրողների հետ զրույցում ասաց ՀՀ էկոնոմիկայի նախարար Գևորգ Պապոյանը՝ անդրադառնալով Փարաքար համայնքի ղեկավար Վալոդյա Գրիգորյանի սպանությանը։

Հարցին, թե բացթողումներ չի տեսնո՞ւմ իշխանության կամ իրավապահ համակարգի կողմից, նա պատասխանեց․ «Կարծում եմ՝ իրավապահ համակարգը պետք է, բնականաբար, քննի բոլոր առումներով, սկսած հայտնաբերումից, վերջացրած՝ թե ինչ պետք է արվեր, որ կանխարգելվեր։ Շատ դատապարտելի բան է տեղի ունեցել, ցանկացած բռնություն մեզ համար խստորեն դատապարտելի է»։

Հիշեցնենք՝ սեպտեմբերի 23-ին՝ ժամը 23.52-ին, ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ 
 
Մահացածներից մեկը Փարաքար համայնքի ղեկավար Վալոդյա Գրիգորյանն է, երկրորդ զոհը քրեական ոստիկան Կարեն Աբրահամյանն է: 

ՆԳՆ մամուլի խոսնակ Նարեկ Սարգսյանը հայտնել է, որ ոստիկանը ծառայության մեջ չի եղել, պարզապես այդ պահին Վալոդյա Գրիգորյանի հետ է եղել. նրանք ընկերական հարաբերություններ են ունեցել:

Մերձավանի կրակոցների և սպանությունների դեպքի առթիվ նախաձեռնվել է քրեական վարույթ։