Գիտնականները ապացուցեցին․ ուղեղի համար «անվնաս» ալկոհոլ գոյություն չունի

Նոր ուսումնասիրությունը, հրապարակված BMJ Evidence-Based Medicine հանդեսում, ապացուցում է․ անգամ նվազագույն քանակությամբ ալկոհոլը կարող է վնասել ուղեղին և բարձրացնել դեմենցիայի առաջացման ռիսկը։ Գիտնականները վերլուծել են ԱՄՆ-ի և Մեծ Բրիտանիայի ավելի քան 550 հազար մարդկանց տվյալներ՝ կիրառելով գենետիկական մեթոդ, որը թույլ է տալիս ճշգրտել ալկոհոլի և ուղեղի հիվանդությունների միջև կապը։

Արդյունքները ցույց են տվել, որ յուրաքանչյուր լրացուցիչ բաժակը մեծացնում է վտանգը․ շաբաթական ընդամենը 1–3 բաժակ հավելյալ սպիրտն ավելացնում է դեմենցիայի հավանականությունը միջինում 15 տոկոսով։ Հատկապես բարձր ռիսկի են ենթարկվում նրանք, ովքեր գենետիկորեն հակված են կախվածությանը։ Գիտնականները ընդգծում են՝ պաշտպանիչ ազդեցություն չի արձանագրվել նույնիսկ ամենափոքր չափաբաժինների դեպքում։

Փորձագետները շեշտում են, որ ուղեղի համար «անվտանգ չափաբաժին» գոյություն չունի։ Ըստ կանխատեսումների՝ 2050-ին դեմենցիայով հիվանդների թիվը կհասնի 153 միլիոնի։ Ուստի ալկոհոլի սահմանափակումը կամ լիակատար մերժումը կարող է դառնալ հիվանդության կանխարգելման հիմնական միջոց։