Թրամփը պատրաստվում է մաքսատուրքեր սահմանել արտասահմանյան կահույքի վրա

ԱՄՆ նախագահ Դոնալդ Թրամփը հայտարարել է, որ նախատեսում է «զգալի մաքսատուրքեր» սահմանել արտասահմանում արտադրված կահույքի ներմուծման համար։ Truth Social հարթակում նա ընդգծել է, որ այս քայլով ուզում է վերակենդանացնել ԱՄՆ կահույքի արդյունաբերությունը, որը տուժել է Չինաստանի և այլ երկրների մրցակցությունից։

«Որպեսզի կրկին մեծացնենք Հյուսիսային Կարոլինան, որը Չինաստանի և այլ երկրների պատճառով ամբողջությամբ կորցրել է իր կահույքի արտադրությունը, ես կներդնեմ էական մաքսատուրքեր ցանկացած երկրի նկատմամբ, որը չի արտադրում կահույք ԱՄՆ-ում։ Մանրամասները շուտով»,— գրել է Թրամփը։

Ավելի վաղ նա հայտնել էր, որ հոկտեմբերի 1-ից նախատեսում է 50 տոկոս մաքսատուրք սահմանել ներմուծվող խոհանոցային պահարանների և լոգասենյակի կահույքի համար, իսկ դեղորայքի համար, եթե այն չի արտադրվում ԱՄՆ-ում, մաքսատուրքը կկազմի 100 տոկոս։ Բացի այդ, նախատեսվում է 25 տոկոս մաքսատուրք սահմանել բեռնատարների ներմուծման համար։