Գիտնականները նշել են հիշողությունը վատացնող ամենավտանգավոր մթերքները

Վիրջինիա Տեքի հետազոտողները պարզել են, որ որոշ ուլտրամշակված մթերքներ լուրջ վնաս են հասցնում ուղեղի գործունեությանը։ The American Journal of Clinical Nutrition-ում հրապարակված ուսումնասիրության համաձայն՝ հատկապես վտանգավոր են վերամշակված միսը և շաքարով գազավորված ըմպելիքները, որոնք մեծացնում են տարեցների հիշողության խնդիրների ռիսկը։

Յոթ տարի շարունակ գիտնականները հետևել են 55 տարեկանից բարձր ավելի քան հինգ հազար ամերիկացիների սննդակարգին և հիշողության թեստերի արդյունքներին։ Պարզվել է, որ ամեն օր գոնե մեկ չափաբաժին վերամշակված միս օգտագործելը բարձրացնում է հիշողության խանգարումների ռիսկը 17%-ով, իսկ յուրաքանչյուր գազավորված ըմպելիքը՝ ևս 6%-ով։ Երկու մթերքի համադրությունը արագացրել է ճանաչողական անկման առաջացումը։

Հետազոտողները խորհուրդ են տալիս նախընտրել քիչ մշակված միս, հնարավորինս պատրաստել տանը և գազավորված ըմպելիքները փոխարինել ջրով՝ նշելով, որ նման պարզ փոփոխությունները կարող են զգալիորեն նվազեցնել վաղաժամ հիշողության կորուստն ու դեմենցիայի վտանգը։