Դասագրքերում առկա են որոշակի QR կոդեր, բայց դրանք օգտագործվում են նաև տանը․ քաղաքապետի տեղակալ

Կարծում եմ, որ այս պրոցեսը ԿԳՄՍ-ի հետ, իհարկե, կքննարկենք և կհասկանանք, թե ինչ կարգով ենք այս ամենն անում։ Դասագրքերում, այո՛, առկա են որոշակի QR կոդեր՝ որոշ բաժիններում, որոշ թեմաներով, բայց եկեք նաև պատկերացնենք, որ դասագրքերն օգտագործվում են ինչպես տանը, այնպես էլ դպրոցում: Այսինքն՝ այստեղ կարող է լինել տարանջատում: Այս մասին լրագրողների հետ զրույցում ասել է Երևանի քաղաքապետի տեղակալ Լևոն Հովհաննիսյանը՝ անդրադառնալով մայրաքաղաքի դպրոցներում բջջային հեռախոսների գործածման արգելքին։

«Եվ երկրորդը՝ հեռախոսներ արգելելու մասով, գիտեք հիմա էլ կա այդ սկզբունքը, այսինքն՝ որոշ դպրոցներում դասի մեկնարկից առաջ ուսուցիչները հավաքում են աշակերտների հեռախոսները, հետո վերադարձնում են և բազմաթիվ դպրոցներ ունենք, որտեղ այդ ամեն ինչը կիրառվում է։   

Նախարարության հետ միասին մենք կքննարկենք, կհասկանանք՝ ինչպես ընդհանուր մոտեցման հասնել, իսկ ինչ վերաբերում է Երևանի քաղաքապետարանին, քաղաքապետը մեր տեսլականը և դիրքորոշումը ասել է և այն հիմնված է բազմաթիվ ուսումնասիրությունների վրա, միջազգային փորձն ենք այստեղ ուսումնասիրել և նաև, որպեսզի վստահ լինենք, որ այն արդյունքի ենք հասնելու, որը պատկերացնում ենք։ Մի քանի դպրոցների մասով առանձին մենք մոնիտորինգ կանենք երեխաների թվանշանները, ֆիզիկական, հոգևոր առողջությունը և այլն ու կհասկանանք՝ ինչպիսի արդյունք ենք ստանում»,– ասաց նա։

Քաղաքապետարանի պաշտոնյայի խոսքով՝ ծնողների վերաբերմունքն այս նախաձեռնությանը, ընդհանուր առմամբ, դրական է։