«Չխաբնվե՛ք ծնկածին». Աննա Մկրտչյան

Չխաբնվեք ծնկածին նորից, չխաբնվեք, որովհետև այս տարվա օգոստոսի 8-ից ձեզ նորից սկսել է համոզել, որ դե ոչինչ, որ նախորդող յոթ տարիների ընթացքում ինչ ասել եմ, սուտ եմ ասել, ոչինչ, որ նախորդող ժամանակահատվածում ամեն ինչ հորինել եմ կեղծիքի և ստի հիման վրա, այ այս մեկը, այ այս վերջինը, որ հորինում եմ, հավատացեք, այս մեկը ճիշտ դուրս կգա։ Այս մասին, այսօր՝ սեպտեմբերի 30–ին, ԱԺ–ում հայտարարությունների ժամին իր ելույթում նշեց «Պատիվ ունեմ» խմբակցության պատգամավոր Աննա Մկրտչյանը։

Նա շարունակեց. «Աասում է ոչինչ, որ ձեզ խաբել ու ասել եմ, որ Շուշին հետ եմ բերելու, ոչինչ, որ խաբել եմ ձեզ ու ասել եմ, որ ինձ հետաքրքրում է արցախահայերի ճակատագիրը կամ իրենց հայրենիքում ապրելու հանգամանքը։ Ասում է՝ ոչինչ, որ խաբել եմ, որ հաշված ժամանակահատված հետո Հայաստանի Հանրապետությունից օկուպացրած տարածքներից Ադրբեջանի զինուժը, վարձկանները դուրս կգան, ոչինչ, որ խաբել, ասել եմ՝ ամիսների ընթացքում գերիները հետ կգան ու դրա փոխարեն նոր գերիներ եմ ուղարկել Բաքու։

Ասում է՝ ոչինչ, որ համերաշխություն եմ խոստացել, բայց մի քանի ամիսը մեկ պարբերականությամբ ասֆալտ լիզել և բորդյուր լիզել եմ ձեզ խոստանում և առաջարկում։

Չխաբնվեք, սիրելի հայրենակիցներ, չխաբնվեք ծնկածին, որովհետև ծնկել է ոչ թե իր մեղքերի գիտակցումից, ծնկել է ոչ թե ձեր առաջ կատարած մեղքերի զգացումից, այլ ծնկել է թուրքերի և ադրբեջանցիների առաջ։ Ծնկել է ոչ թե ձեր առաջ, այլ ձեզ է ծնկի բերել թուրքերի ու ադրբեջանցիների առաջ, հաղթած հայ ժողովրդին դարձրել պարտված։

Ու եթե ինքը իրեն կողքից տեսներ, ինքը իր մասին կողքից խոսելու լիներ, ինքը իր բառապաշարով ասելու էր, որ ծնկել է 2018-ին, ծնկել է 2019-ին, 2020-ին, 2021-ին, ծնկել է 2022-ին, 2023-ին, 2024-ին, 2025-ին, ու ծնկելու եմ  2026-ին եթե մնամ, ու այդ մնալու համար ամեն ինչ անում եմ, անգամ ՄԱԿ-ում մի խեղճ ու կրակ ելույթ էր խաղում, բայց այդ խաղին էլ չխաբնվեք, որովհետև նույնիսկ այդ խաղի ժամանակ իր համար ամենակարևոր նախադասությունը ասաց։ Նախադասություն, որը հետաքրքիր էր միայն թուրքին ու ադրբեջանցուն, չնայած դահլիճում էլ չէին, բայց հույս ուներ, որ հետո կլսեն ու կգնահատեն։ Ասաց, որ ինքը պատրաստ է Հայաստանի երազանքների ու նպատակներն արտացոլող սահմանադրությունը փոխել, միայն կարևոր է, որ պիտի օգնեն իրեն վերընտրվի։

Այ սրա համար ենք ասում, հարգելի հայրենակիցներ, որ ընտրություններին սպասել պետք չէ, որովհետև իրենք արդեն իրենց տերերի հետ այդ ընտրությունները կեղծել են։ Սրա համար ենք ասում իրենց քայլերին ու գործողություններին մի հետևեք, այլ հիմա, այսօր սկսեք պայքարել, որ ձեր պայքարի արդյունքը հանկարծ չուշանա»,–ասաց նա։