Թրամփի ուղարկած ամերիկյան սուզանավերը վտանգ չեն ներկայացնում Ռուսաստանի համար

Ռուսաստանի Սևծովյան նավատորմի նախկին հրամանատար, ադմիրալ Վլադիմիր Կոմոեդովը aif.ru-ի հետ զրույցում հայտարարել է, որ ԱՄՆ նախագահ Դոնալդ Թրամփի կողմից Ռուսաստան ուղարկված սուզանավերը չեն սպառնում երկրի անվտանգությանը։

Կոմոեդովի խոսքով՝ ռազմավարական միջուկային հրթիռներով զինված սուզանավերը չեն գործում Ռուսաստանի անմիջական մերձակայքում, այլ պահվում են Ատլանտյան և Խաղաղօվկիանոսյան ափամերձ փակ շրջաններում։ Նա խորհուրդ է տվել Թրամփին ծանոթանալ ԱՄՆ ռազմածովային ուժերի կառուցվածքին՝ հասկանալու սուզանավերի կիրառման կանոնները խաղաղ ժամանակ և բարձր պատրաստականության փուլերում։

Ադմիրալը հիշեցրել է, որ ոչ միջուկային սպառազինությամբ ամերիկյան սուզանավերը վաղուց հերթապահում են Ռուսաստանի սահմանների մոտ։ Ավելի վաղ Թրամփը հաստատել էր, որ 1-2 ատոմային սուզանավ ուղարկել է Ռուսաստանի ափերի մոտ՝ նշելով, որ դրանք «թաքնված են» և հույս հայտնել, որ դրանց օգտագործումը պետք չի լինի։