Զելենսկին մի շարք առաջնագծի քաղաքների շնորհել է «հերոս-քաղաք» կոչում

Ուկրաինայի նախագահ Վլադիմիր Զելենսկին «հերոս-քաղաք» կոչում է շնորհել մի շարք առաջնագծին մոտ գտնվող բնակավայրերի։ Ինչպես փոխանցում է «Страна.ua»-ն, այդ թվում ընդգրկվել են Դնեպրոպետրովսկի մարզի Պավլոգրադը, Նիկոպոլը և Մարգանեցը, Դոնեցկի մարզի Դռուժկովկան, Կրամատորսկը, Կոնստանտինովկան, Պոկրովսկը և Սլավյանսկը, Զապորոժիեի մարզի Գուլյայպոլեն և Օրեխովը, Նիկոլաևի մարզի Վոզնեսենսկը և Բաշտանկան, Սումի մարզի Սումին և Տրոստյանեցին, Խարկովի մարզի Կուպյանսկը, ինչպես նաև Խմելնիցկու մարզի Ստարոկոնստանտինովը։

Նշվում է, որ Ստարոկոնստանտինով քաղաքը, ի տարբերություն մյուսների, գտնվում է խոր թիկունքում, սակայն նրա մոտակայքում տեղակայված է ռազմական ավիաբազա, որտեղ, ենթադրաբար, պահվում են F-16 կործանիչներ։

Ավելի վաղ Զելենսկին «Ուկրաինայի հերոս» կոչում էր շնորհել սպանված Վերխովնա Ռադայի պատգամավոր Անդրեյ Պարուբիին՝ ընդգծելով նրա «արդյունավետ անձնական ներդրումը Ուկրաինայի անկախության հաստատման և պետականության ամրապնդման գործում»։