ԱՄՆ-ում այդքան ուժեղ տորնադո չէր գրանցվել վերջին 12 տարում․ Լևոն Ազիզյան

ԱՄՆ-ի տարածքում արդեն ավելի քան 12 տարի չէր արձանագրվել առավելագույն ուժգնության՝ EF5 կարգի տորնադո։ Այս մասին հայտնում է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։

 

«Եվ ահա ԱՄՆ-ի Ազգային օդերևութաբանական ծառայությունը վերջերս իրականացրեց բոլոր տվյալների խորքային վերլուծություն հունիսի 20-ին Հյուսիսային Դակոտայի Էնդերլին քաղաքում գրանցված տորնադոյի վերաբերյալ և բարձրացրեց նրա կատեգորիան մինչև EF5։

 

Մասնագետների գնահատմամբ՝ քամու առավելագույն արագությունը հասել է 338 կմ/ժ (94 մ/վ), երբ տորնադոն անցել է Ռասս և Կասս շրջաններով՝ դառնալով երեք մարդու մահվան պատճառ։

 

Ինչու՞ զեկույցը հրապարակվեց Հյուսիսային Դակոտային տորնադոյի հարվածից գրեթե չորս ամիս անց։

 

Ամեն անգամ տորնադոյի մասին հաղորդագրությունից հետո օդերևութաբանական ծառայությունը դեպքի վայր է ուղարկում օդերևութաբանների խումբ, որը գնահատում է վնասները և որոշում՝ արդյոք դրանք համապատասխանում են տորնադոյի պատճառած ավերածություններին, և եթե այո՝ ապա, որ կատեգորիային ըստ Ֆուջիտայի սանդղակի։ Այդ գործընթացը հաճախ տևում է մի քանի օր կամ շաբաթ, սակայն երբեմն, ինչպես այս դեպքում, կարող է տևել ամիսներ։

 

Վերջնական գնահատման համար Ազգային ծառայությունը ներգրավել է ինժեներների և գիտնականների թիմ, որը պարզել է, որ երկաթուղային վագոնի մոտ 150 մետր բարձրացում, ինչպես նաև ամբողջությամբ հացահատիկով բեռնված վագոնների շրջումը համապատասխանում են EF5 կատեգորիայի տորնադոյի քամու արագությանը։

 

Հետաքրքիր է նշել, որ առանց այդ վագոնների գրեթե անհնար կլիներ որոշել այդ տորնադոյի EF5 կատեգորիայի ուժգնությունը, քանի որ Ֆուջիտայի սանդղակը հիմնված է բացառապես տորնադոյի պատճառած վնասների և ավերածությունների վրա»,-նշել է նա։