Ռոնալդու. «Ընտանիքս խորհուրդ է տալիս ավարտել կարիերաս»

Պորտուգալիայի հավաքականի հարձակվող Կրիշտիանու Ռոնալդուն խոստովանել է, որ իր մտերիմները կարիերան ավարտելու խորհուրդ են տալիս, հայտնում է A Bola-ն:

«Ընկերներս, ընտանիքս ինձ խորհուրդ են տալիս ավարտել կարիերաս: Նրանք ասում են՝ չե՞ս ուզում դադար վերցնել, դու արդեն ամեն ինչի հասել ես, ինչո՞ւ ես ուզում հատել 1000 գոլի շեմը:

Ես համաձայն չեմ նրանց հետ: Կարծում եմ՝ դեռ կարողանում եմ բարձր մակարդակի խաղ ցույց տալ, կարողանում եմ օգնել ակումբիս ու հավաքականիս, ինչո՞ւ չշարունակեմ խաղալ: Վստահ եմ, որ երբ ավարտեմ կարիերաս, բավարարվածություն եմ զգալու, քանի որ արել եմ այն ամենը, ինչ կարող էի: Գիտեմ, որ ինձ խաղալու քիչ ժամանակ է մնացել, բայց ես փորձում եմ վայելել յուրաքանչյուր ակնթարթը»,- ասել է Ռոնալդուն:

«Ալ Նասրի» առաջատարը ստացել է Globo Prestigio մրցանակը՝ Պորտուգալիայի հավաքականի կազմում անցկացրած տարիների և ունեցած նվաճումների համար: Հավաքականի կազմում Ռոնալդուն անցկացրել է 223 խաղ և խփել 141 գոլ, դարձել Եվրոպայի չեմպիոն ու Ազգերի լիգայի հաղթող: