Լավրովը հերքեց Ասադի թունավորման լուրերը

Ռուսաստանի արտգործնախարար Սերգեյ Լավրովը հերքել է տարածված տեղեկությունները, թե Մոսկվայում փորձ է արվել թունավորել Սիրիայի նախկին նախագահ Բաշար Ասադին։ «Ոչ մի թունավորում չի եղել։ Եթե նման լուրեր են շրջանառվում, թող դրանք մնան նրանց խղճին, ովքեր դրանք տարածում են», — ասել է Լավրովը՝ РИА Новости-ին տված մեկնաբանության մեջ։

Նրա խոսքով՝ Ասադի և նրա ընտանիքի ներկայությունը Ռուսաստանում կրում է բացառապես հումանիտար բնույթ։ Լավրովը շեշտել է, որ որևէ վտանգ կամ քաղաքական ենթատեքստ այս պատմության մեջ չկա։

Ավելի վաղ հաղորդվել էր, որ Ասադը դուրս է գրվել մոսկովյան հիվանդանոցից, որտեղ նրան այցելելու թույլտվություն տրվել էր միայն նախկին գեներալ-քարտուղար Մանսուր Ազզամին։ Հունվարին տարածված լուրերի համաձայն՝ Սիրիայի նախկին առաջնորդը, Մոսկվա ժամանելուց հետո, վատառողջ էր զգացել, և բժիշկները նրա օրգանիզմում հայտնաբերել էին թույնի հետքեր։