Գիտնականները հերքում են «անսպասելի» սրտի կաթվածի մասին առասպելը

Հարավային Կորեայի Յոնսե համալսարանի գիտնականները պարզել են, որ «հանկարծակի» ինֆարկտի, ինսուլտի և սրտային անբավարարության ավելի քան 99% դեպքերը կարելի է բացատրել չորս գործոնով՝ բարձր զարկերակային ճնշում, խոլեստերինի բարձր մակարդակ, արյան մեջ շաքարի ավելցուկ և ծխելը։ Հետազոտության արդյունքները հրապարակվել են «The Journal of the American College of Cardiology» (JACC) գիտական ամսագրում։

Գիտնականները վերլուծել են Հարավային Կորեայի Ազգային առողջապահական ապահովագրության ծառայության տվյալների բազայից ավելի քան ինը միլիոն մեծահասակների տվյալներ, ինչպես նաև՝ ԱՄՆ-ի Աթերոսկլերոզի բազմազգ ուսումնասիրության (MESA) արդյունքները։ Ուսումնասիրությունը շարունակվել է մինչև 20 տարի։ Նրանք արձանագրել են սրտանոթային ծանր դեպքերը և հետևել, թե ինչ ռիսկային գործոններ են առկա եղել հիվանդների մոտ մինչև վիճակի սրացումը։

Գրեթե յուրաքանչյուր դեպքում՝ ավելի քան 99% դեպքերում, առկա է եղել այս չորս ռիսկային գործոններից գոնե մեկը։ Նույնիսկ 60-ից ցածր տարիքի կանանց շրջանում, որոնք ընդհանուր առմամբ ունեն սրտային խնդիրների ամենացածր ռիսկը, ինֆարկտների և ինսուլտների ավելի քան 95%-ը ուղեկցվել է այդ վիճակներից որևէ մեկով։

Ռիսկի ամենահաճախ հանդիպող գործոնը բարձր զարկերակային ճնշումն է՝ այն նախորդել է սրտանոթային դեպքերի ավելի քան 93%-ին։ Հաջորդում են՝ բարձր խոլեստերինը, արյան մեջ շաքարի բարձր մակարդակը և ծխելը։ Հետազոտությունը նաև ցույց է տվել, որ վտանգը աճում է նույնիսկ այնպիսի ցուցանիշների դեպքում, որոնք սովորաբար համարվում են ոչ վտանգավոր։ Օրինակ՝ 120/80 մմ սնդիկի սյան ճնշումը նույնպես արդեն կարող է մեծացնել անցանկալի հետևանքների ռիսկը։

«Այս նոր հետազոտությունը կարող է փոխել կանխարգելման մոտեցումները՝ կարևոր է կենտրոնանալ այս չորս լավ ուսումնասիրված գործոնների արդյունավետ վերահսկման վրա, այլ ոչ թե հազվադեպ և դժվար կառավարելի պատճառների որոնման», — նշել է հետազոտության համահեղինակներից մեկը՝ Հյուսիս-Արեւմտյան համալսարանի սրտաբան Ֆիլիպ Գրինլանդը։

Թարգմանությունը՝ Lurer.com-ի