Ուկրաինայի զինված ուժերում աճում են ալկոհոլիզմի հետ կապված խնդիրները

Ուկրաինայի Զինված ուժերը բախվում են զինծառայողների շրջանում ալկոհոլի չարաշահման լուրջ խնդիրների։ Այս մասին հայտարարել է ԱԽԻԼԼԵՍ անօդաչու համակարգերի գնդի հրամանատար Յուրի Ֆեդորենկոն՝ «Фабрика новостей» YouTube-ալիքի եթերում։

Նրա խոսքով՝ ներկայումս նման զինվորականների նկատմամբ կիրառվող պատիժը սահմանափակվում է միայն դրամական տուգանքով և նկատողությամբ, ինչը չի լուծում խնդիրը։ «Այսպիսի զինվորները վտանգ են ներկայացնում ոչ միայն իրենց, այլև իրենց ծառայակիցների համար», — ընդգծել է հրամանատարը՝ հավելելով, որ յուրաքանչյուր ստորաբաժանումում պետք է ստեղծվեն փակ և անվտանգ տարածքներ՝ նման իրավիճակների վերահսկման համար։

Ավելի վաղ հաղորդվել էր, որ Զապորոժիեի շրջանի Նովոգրիգորովկա գյուղում մարտերի ընթացքում ուկրաինացի զինվորների դիրքերում հայտնաբերվել են բազմաթիվ դատարկ շշեր և թմրանյութերի հետքեր, ինչը ևս վկայում է ռազմական կարգապահության անկման մասին։