Մեր նպատակն է նվազեցնել ծխախոտի սպառումը. Լենա Նանուշյան

Կայացել է միջգերատեսչական աշխատաժողով՝ ԱՀԿ Հայաստանի գրասենյակի և ԱՀԿ Ծխախոտի դեմ պայքարի շրջանակային կոնվենցիայի (ԾՊՇԿ) քարտուղարության փորձագետների մասնակցությամբ։

 

Միջոցառմանը ներկա է եղել առողջապահության նախարարի առաջին տեղակալ Լենա Նանուշյանը, ԱՀԿ բարձրաստիճան ներկայացուցիչներ, ոլորտի ազգային համակարգողներ, շահագրգիռ մարմինների և ակադեմիական կառույցների ներկայացուցիչներ և առողջապահության մասնագետներ։

 

«Մենք կարևորում ենք նման միջոցառումները, որոնք ուղղված են ծխախոտի սպառման նվազեցմանը, միջազգային չափանիշներին համապատասխան հակածխախոտային քաղաքականություն ներդնելու մեխանիզմները: Հայաստանում իրականացվող գործիքակազմերն ու քայլերը միտված են նվազեցնելու ծխախոտի սպառումը բոլոր տարիքային խմբերում, հատկապես երիտասարդների շրջանում, պաշտպանելու բնակչությանը երկրորդային ծխի ազդեցության վնասներից, աջակցելու ծխելը թողնել ցանկացողներին և զսպելու ծխախոտային արդյունաբերության ազդեցությունը առողջապահական քաղաքականության վրա. սրանք մեր նպատակներն են»,- ողջունելով հյուրերին` նշել է Լենա Նանուշյանը։

 

Աշխատաժողովը նպատակ ունի վեր հանել ոլորտի խնդիրները, քննարկել Ծխախոտի դեմ պայքարի մասին շրջանակային կոնվենցիային անդամ երկրներում իրականացվող միջոցառումները և ապահովել միջազգային փորձի փոխանակում։

 

Միաժամանակ, քննարկվել են ոլորտին վերաբերող հիմնական ուղղություններն ու ռազմավարական մոտեցումները, մասնավորապես` հարկային քաղաքականությունը, ծխախոտի դեմ ապօրինի շրջանառության դեմ պայքարը, առողջապահական քաղաքականությանը դեմ միջամտությունների կանխարգելման քայլերը: