Մեծ Բրիտանիան վերացնում է Հայաստանին զենքի վաճառքի էմբարգոն

Մեծ Բրիտանիայի խորհրդարանի կայքում տեղադրվել է Միացյալ Թագավորության Եվրոպայի, Հյուսիսային Ամերիկայի և արտաքին գործերի պետնախարար Սթիվեն Դաութիի հայտարարությունը՝ Ադրբեջանին և Հայաստանին զենք մատակարարելու էմբարգոյի վերացման վերաբերյալ։

Հայտարարության մեջ ասվում է.

▪️«Ցանկանում եմ Ձեզ տեղեկացնել Հարավային Կովկասում տեղի ունեցող նշանակալի զարգացումների և Հայաստանի ու Ադրբեջանի միջև խաղաղության գործընթացում արձանագրված առաջընթացին Մեծ Բրիտանիայի արձագանքի մասին։

▪️Օգոստոսի 8-ին ԱՄՆ նախագահ Դոնալդ Թրամփը Վաշինգտոնում անցկացրեց եռակողմ գագաթնաժողով՝ Իլհամ Ալիևի և Նիկոլ Փաշինյանի մասնակցությամբ։ Արդյունքում նախաստորագրվեց խաղաղության համաձայնագիր և ստորագրվեց հռչակագիր։ Փաստաթղթերը ներառում են ԵԱՀԿ Մինսկի խմբի լուծարման կոչ և պարտավորություն՝ ապահովելու Ադրբեջանի և Նախիջևանի միջև հաղորդակցությունը՝ հարգելով Հայաստանի ինքնիշխանությունը։

▪️Մեծ Բրիտանիան ողջունում է ձեռք բերված առաջընթացը։ Սա կարևոր քայլ է դեպի խաղաղություն և կայունություն։ Այս առումով մենք մեր հարաբերությունները Հայաստանի և Ադրբեջանի հետ բարձրացնում ենք ռազմավարական գործընկերության մակարդակի՝ առևտրի, անվտանգության և պաշտպանության ոլորտներում՝ ամեն տարի նախարարական հանդիպումների միջոցով։

▪️Օգոստոսի 24-ից 26-ը ես այցելեցի երկու երկրներ՝ վերահաստատելու աջակցությունը և քննարկելու գործնական քայլերը։ Մենք աջակցեցինք Մինսկի խմբի լուծարմանը։ Հաշվի առնելով արձանագրված առաջընթացը՝ կարծում ենք, որ 1992 թվականի ԵԱՀԿ զենքի էմբարգոն այլևս արդիական չէ։ Մեծ Բրիտանիան ամբողջությամբ վերացնում է Հայաստանին և Ադրբեջանին զենքի մատակարարման վրա դրված էմբարգոն։

▪️Սա մեզ հնարավորություն կտա զարգացնել անվտանգության ոլորտում համագործակցությունը և օգնել երկրներին պաշտպանել իրենց ինքնիշխանությունն ու տարածքային ամբողջականությունը, ներառյալ հիբրիդային սպառնալիքներին արձագանքանքը։

▪️Արտահանման լիցենզիաները կվերանայվեն անհատապես՝ խիստ չափանիշների համաձայն։ Մենք կհետևենք տարածաշրջանում տիրող իրավիճակին։

▪️Հույս ունենք, որ սա Հարավային Կովկասում խաղաղության, անվտանգության և բարգավաճման համար ճանապարհ կհարթի։ Մեծ Բրիտանիան պատրաստ է համագործակցել երկու երկրների, ԱՄՆ-ի, ԵՄ-ի և այլ գործընկերների հետ՝ այս փոփոխություններին ու տարածաշրջանային կայունությանը աջակցելու համար։