Մենք խաղում ենք հայերի համար՝ և՛ ներսում, և՛ դրսում․ Եղիշե Մելիքյան

Հայաստանի ազգային հավաքականի գլխավոր մարզիչ Եղիշե Մելիքյանը նախախաղային ասուլիսում խոսել է իր աշխատանքի առանձնահատկությունների, պատասխանատվության զգացողության և առաջիկա հանդիպման կարևորության մասին։

Մելիքյանը նշել է, որ ակումբային և հավաքականի աշխատանքը էապես տարբերվում են միմյանցից․ «Տարբերություն այո կա և շատ է։ Ես ինքս պատասխանատու մարդ եմ, ակումբում աշխատելիս էլ պատասխանատվություն էի զգում, բայց հավաքականի գլխավոր մարզիչ լինելը բոլորովին այլ է։ Ակումբում ֆուտբոլիստները պայմանագիր ունեն, և դու գիտես՝ ինչպես պահանջես նրանցից։ Իսկ հավաքականում նրանք գալիս են հրավերով, այստեղ ֆինանսական հարցեր չկան։ Պետք է առաջնորդվել միայն հայրենասիրությամբ, նվիրվածությամբ և պատասխանատվությամբ»։

Խոսելով թիմի մոտիվացիայի մասին՝ Մելիքյանը ընդգծել է, որ հավաքականը խաղում է բոլոր հայերի համար՝ թե՛ Հայաստանում, թե՛ Սփյուռքում․ «Մենք երբ դրսում ենք խաղում, մտածում ենք սփյուռքահայերի մասին, որ իրենք օտար երկրում հպարտ զգան։ Բայց նաև մեզ համար կարևոր է ներսի հայերի տրամադրությունը բարձրացնելը։ Մենք ցանկանում ենք ցույց տալ հաղթողի հոգեբանություն, և դա է մեր գլխավոր մոտիվացիան։ Երկու դեպքում էլ մենք խաղում ենք մեր ժողովրդի համար»։

Խոսելով առաջիկա խաղի մասին՝ Մելիքյանը նշեց, որ թիմը հոգեբանորեն պատրաստ է դժվար պայքարի․ «Երբ տանը հաղթեցինք Իռլանդիային, ասացի, որ նրանց հետ հաջորդ հանդիպումը լինելու է այլ ֆուտբոլ։ Մենք գիտենք, որ մրցակցի մոտիվացիան շատ բարձր է, քանի որ նրանց համար սա վերջին հնարավորություններից մեկն է։ Բայց նույն իրավիճակում ենք նաև մենք։ Երկու թիմերն էլ կորցրել են միավորներ, և այս երեք միավորը շատ կարևոր է»։

Հիշեցնենք, որ այսօր՝ հոկտեմբերի 14-ին ազգային ընտրանին ԱԱ-2026-ի եվրոպական գոտու ընտրական մրցաշարի F խմբի չորրորդ տուրում Դուբլինի «Ավիվա» ստադիոնում կհանդիպի Իռլանդիայի ազգային հավաքականին: