Հույսով ենք, որ ԵԱՀԿ հարթակն այս և հաջորդ նախագահությունների ժամանակ կնպաստի հետագա խաղաղության ամրապնդմանը. Միրզոյան

ԵԱՀԿ գործող նախագահողի այցը տարածաշրջան տեղի է ունենում միանգամայն նոր հանգամանքներում, մեր տարածաշրջանի համար նշանակալի իրադարձությունների պայմաններում: Այդ մասին Ֆինլանդիայի ԱԳ նախարար Էլինա Վալտոնենի հետ համատեղ ճեպազրույցի ժամանակ ասաց ՀՀ ԱԳ նախարար Արարատ Միրզոյանը:

Նախարարը տեղեկացրեց, որ գործընկերոջ հետ խոսել է Հայաստանի և Ադրբեջանի միջև հաստատված խաղաղությունից, նրան է ներկայացրել մանրամասներն օգոսոտսի 8-ին նախաստորագրված պայմանագրից, խոսել է սկզբունքներից, որոնց շրջանակներում տեղի է ունենալու տրանսպորտային ենթակառուցվածքների ապաշրջափակումը:

«Գաղտնիք չէ, որ ԵԱՀԿ-ն իր գործիքակազմով կոչված էր նպաստելու Հարավաին Կովկասում խաղաղության հաստատմանը, և այժմ, երբ այդ խաղաղությունը հաստատված է, մենք, ի թիվս այլ պայմանավորվածությունների, ձեռնամուխ ենք եղել ԵԱՀԿ Մինսկի խմբի կառույցների լուծարմանը:

Այս նոր իրողությունները նոր են նաև Հայաստան-ԵԱՀԿ համագործակցության կամ ԵԱՀԿ-ում Հայաստանի մասնակցության տեսանկյունից ևս: Որպես նոր իրողություններում գտնվող պետություն՝ այստեղ պետք է մեզ համար բացահայտենք համագործակցության և մասնակցության նոր հորիզոններ, հարթությունների նոր շրջանակ: Մենք մեծապես հետաքրքրված ենք տնտեսական համագործակցության հնարավորություններով, նաև բնապահպանական, շրջակա միջավայրի հետ կապված հարցերով:

Եվ երկրորդ՝ մենք մեծապես հույս ունենք, որ ԵԱՀԿ հարթակը այս և հաջորդ նախագահությունների ժամանակ կնպաստի հետագա խաղաղության ամրապնդմանը: Սա վերաբերում է ոչ միայն Հարավային Կովկասին, այլև ԵԱՀԿ ամբողջ գոտուն: Եվ շատ կարևոր է ուշադրություն դարձնել հատկապես այս հարթությանը՝ ժողովուրդների միջև թշնամանքի վերացմանը»,- ասաց նա՝ մեջ բերելով Վաշինգտոնում նախաստագրված պայմանագրից՝ ժողովուրդների միջև թշնամանքի վերացմանն առնչվող հատվածը:

Ըստ նախարարի՝ ընդհանուր առմամբ ՀՀ-ն ցանկանում է տեսնել ուժեղ և արդյունավետ ԵԱՀԿ, արդյունավետ կազմակերպություն՝ բոլոր երեք չափումներով:

«Ներկայիս աշխարհաքաղաքական միջավայրում ԵԱՀԿ-ն կարիք ունի մասնակից պետությունների ամուր հանձնառության, պատմական փաստաթղթի (նկատի ունեմ Հելսինկյան եզրափակիչ ակտը) ոգուն և սկզբունքներին մասնակից երկրների կողմից անսասան հավատարմության՝ այդ կերպ ամրապնդելու կազմակերպության արդյունավետությունն ու դիմակայությունը, որպեսզի այն իր առաջնային մանդատին համապատասխան կարողանա նպաստել ԵԱՀԿ պատասխանատվության գոտում անվտանգությանն ու կայունությանը, հակամարտությունների կարգավորմանը, մարդու իրավունքների կոպիտ խախտումները կանխելուն, խախտված իրավունքների վերականգնման ջանքերին:

Մենք մշտապես հանդես ենք եկել ամբողջ ԵԱՀԿ պատասխանատվության տարածքում Հելսինկյան եզրափակիչ ակտի սկզբունքների լիարժեք կիրառման օգտին, և այսուհետ ևս մեր ջանքերն ուղղված կլինեն սրան»,- ասաց նա: