ԱՄՆ բանակի հիմնական հրետանային համակարգը հնացած է ճանաչվել

Ամերիկյան բանակի հիմնական ինքնագնաց հրետանային համակարգերը՝ M109 հաուբիցները, կարող են հեշտությամբ ոչնչացվել Չինաստանի ժամանակակից հրետանային ուժերի կողմից՝ հնարավոր ռազմական բախման դեպքում։ Այդ մասին հայտնում է ամերիկյան The National Interest (TNI) պարբերականը։

Հրապարակման մեջ նշվում է, որ M109 համակարգը ստեղծվել է դեռևս 1960-ականների սկզբին և, թեև մի քանի անգամ արդիականացվել է, այն այժմ զգալիորեն հետ է մնում ժամանակակից տեխնոլոգիաներից։ Նույնիսկ ամենավերջին տարբերակը՝ M109A6 Paladin, որն ունի 30 կիլոմետր կրակային հեռահարություն, համարվում է հնացած։

Ըստ TNI-ի՝ Չինաստանը և Ռուսաստանը արդեն մշակել են նոր հրետանային համակարգեր՝ զգալիորեն մեծ հեռահարությամբ, ինչի արդյունքում ԱՄՆ-ի հաուբիցները կարող են «լռել» դեռ այն ժամանակ, երբ չինական կամ ռուսական հրետանին անգամ չի հայտնվի ռադարների վրա։ Նյութում նշվում է, որ ամերիկյան բանակը կանգնած է հրատապ տեխնոլոգիական արդիականացման անհրաժեշտության առաջ։