ԵՄ հանձնաժողովը ցանկանում է ընդլայնել «անօդաչուների պատի» նախագիծը՝ ընդգրկելով ողջ մայրցամաքը

Եվրոպական հանձնաժողովը պատրաստվում է ընդլայնել իր նախաձեռնությունը՝ հայտնի որպես «անօդաչուների պատ» (Drone Wall), որը նախատեսված է ԵՄ արևելյան սահմանների պաշտպանության համար։ Նոր առաջարկը կներառվի «պաշտպանական պատրաստության ճանապարհային քարտեզում», որը կներկայացվի հոկտեմբերի 16-ին, հայտնում է Reuters-ը՝ հղում անելով ԵՄ աղբյուրներին։

Նախաձեռնության գաղափարը առաջ է քաշվել այն բանից հետո, երբ մոտ 20 ռուսական անօդաչու սարք ներթափանցել էր Լեհաստանի օդային տարածք՝ խախտելով ԵՄ և ՆԱՏՕ անդամ պետության սահմանը։ Նախագիծը նախատեսում է ստեղծել զգայուն սենսորների, էլեկտրոնային խափանման համակարգերի և հակաանօդաչու զինատեսակների ցանց, որը կձգվի Բալթիկայից մինչև Սև ծով։

Թեև արևելյան երկրները ողջունել են նախաձեռնությունը, ԵՄ-ի հարավային և արևմտյան երկրները դժգոհել են՝ նշելով, որ իրենց տարածաշրջաններն անտեսվել են։ Արդյունքում, հանձնաժողովը մշակել է նոր տարբերակ՝ վերանվանելով այն «Եվրոպական անօդաչու պաշտպանության նախաձեռնություն» (European Drone Defence Initiative)։ ԵՄ պաշտպանության հանձնակատար Անդրիուս Կուբիլիուսը, ելույթ ունենալով Բրյուսելում կայացած պաշտպանության համաժողովում, ակնարկել է փոփոխությանը՝ շփոթվելով հին և նոր անվանումների միջև ու հավելելով. «Մենք առաջարկում ենք Եվրոպական անօդաչուների պատը... այսինքն՝ Եվրոպական անօդաչու պաշտպանության նախաձեռնությունը՝ պաշտպանելու ամբողջ Եվրոպան»։